Sænska hörkutólið og kvikmyndaleikarinn Dolph Lundgren, sem er þekktur fyrir hlutverk sín í kvikmyndum eins og til dæmis Rocky IV, The Expendables og The Masters of the Universe, giftist unnustu sinni, Emma Krokdal, nýlega í athöfn á grísku eyjunni Mykonos.

Lundgren er 65 ára gamall en Krokdal 27 ára. Breski fjölmiðilinn Mirror greinir frá og segir að skötuhjúin hafi trúlofað sig árið 2020. Brúðkaupið fór fram í glæsihýsi þeirra á eyjunni að viðstaddri fjölskyldu og nánustu vinum. Dolph Lundgren var áður giftur Anette Qviberg og á með henni dæturnar Ida, sem er 27 ára, og Greta sem er 21 árs.

Parið segir að fresta hafi þurft brúðkaupinu nokkrum sinnum vegna Covid-19 heimsfaraldursins og vegna læknismeðferða sem Lundgren hefur þurft að sækja. Þeim fannst tími kominn til að fagna ástinni, lífinu og hamingjunni.

Lundgren greindi frá því í maí síðastliðnum að hann hefði greinst með krabbamein fyrir átta árum og hann segist vera mun þakklátari fyrir lífið en áður. Æxli fannst í öðru nýra hans og hann hóf strax meðferð. Lundgren segir að næstu fimm árin hafi ekkert sést í reglulegum myndatökum en  árið 2020 var honum tjáð að krabbameinið hafi því miður dreift sér í lungun, lifrina og magann. Æxli sem fannst í lifrinni var ekki talið skurðtækt og lyfja-og geislameðferð olli miklum aukaverkunum eins og til dæmis þyngdartapi og niðurgangi.

Honum var loks tjáð að hans biði því miður ekkert annað en dauðinn. Hann segist hafa spurt krabbameinslækninn hvað hann ætti langt eftir. Svarið var tvö til þrjú ár en Lundgren segist hafa heyrt það á raddblæ læknisins að líklega ætti hann enn skemmri tíma eftir ólifaðan.