Bandaríska kvikmyndin Titanic verður tekin til sýningar á efnisveitunni Netflix þann 1. júlí næstkomandi. Titanic sem var frumsýnd árið 1997 er fjórða mest sótta kvikmynd sögunnar í kvikmyndahúsum heimsins. Myndin fjallar um kynni ungrar hefðarkonu, sem leikin er af Kate Winslet, og fátæks listamanns, sem leikinn er af Leonardo DiCaprio, á farþegaskipinu Titanic, sem sökk í Norður-Atlantshafi árið 1912 eftir að hafa siglt á ísjaka.

Eins og mörgum er kunnugt fórst kafbáturinn Titan með fimm menn innanborðs í liðinni viku við skoðunarferð að flaki Titanic.

Í frétt Variety segir að sú staðreynd að Titanic verði tekin til sýningar á Netflix svo skömmu eftir Titan-slysið hafi vakið reiði á samfélagsmiðlum. Meðal ummæla sem fólk hefur viðhaft á samfélagsmiðlum er að Netflix sé að fara yfir öll velsæmismörk með sýningu myndarinnar. Netflix hefur verið sakað um að reyna að græða á Titan-slysinu með því að hefja sýningar á kvikmyndinni.

Einn notandi Twitter segir streymisveituna haga sér með hætti sem sé miklu meira en ósmekklegur.

Samkvæmt heimildum Variety er þó um einskæra tilviljun að ræða. Fyrst að Titanic verði sýnd á Netflix frá og með 1. júlí sé ljóst að samið hafi verið um sýningarréttinn við framleiðendur myndarinnar fyrir mörgum mánuðum og þar með löngu áður en Titan fórst.

Leikstjóri Titanic, James Cameron, hefur farið í margar ferðir sjálfur, í kafbátum, niður að flaki farþegaskipsins sem kvikmynd hans er nefnd eftir. Hann hefur tjáð sig opinberlega um Titan-slysið og sagt að margir hafi lýst yfir áhyggjum vegna ástands og öryggis bátsins. Cameron segir margt líkt með Titanic-slysinu og Titan-slysinu. Í báðum tilfellum hafi skipstjórinn siglt ótrauður áfram þrátt fyrir viðvaranir um að mikil hætta steðjaði að.