Klukkan 10 að morgni þann 22. nóvember 1963 hringdi kona í neyðarlínuna í Oxnard í Kaliforníu og hvíslaði að forseti Bandaríkjanna myndi deyja eftir 10 mínútur.
Starfsmaður neyðarlínunnar bað konuna um að vera áfram á línunni sem hún og samþykkti. Nokkrum mínútum seinna hvíslaði hún aftur að forseti Bandaríkjanna myndi deyja klukkan 10:30. Hún hélt síðan áfram að tala en það var að mestu leyti eitthvað illskiljanlegt rugl um hæstarétt og að eldar myndu loga um alla glugga. Hún hvíslaði einnig að ríkisstjórnin myndi gera allar eigur upptækar. Hún lagði á klukkan 10:25.
Símtalið talið rugl
Símtalið var eðlilega skráð sem rugl frá brengluðum einstaklingi enda fær forseti Bandaríkjanna fleiri tugi hótana daglega. Forsetinn var ekki einu sinni staddur í Kaliforníu svo það var ekki talin nein ástæða til að óttast um öryggi hans. Starfsmaður neyðarlínunnar hló eftir að konan lagði á og sagði kollegum sínum að þessi hefði jafnvel verið vitlausari en flestir.
Meðan á símtalinu stóð var forseti Bandaríkjana, John Kennedy, í bílalest í borginni Dallas í Texas. Hann sat í bíl ásamt konu sinni þegar að Lee Harvey Oswald skaut hann til bana. Klukkan var þá nákvæmlega 10:30 á Kaliforníutíma. Konan hafði spáð fyrir dauða forsetans upp á mínútu.
Það sem er enn furðulegra er að Kennedy var á eftir áætlun þar sem hann hafði ítrekað látið stoppa bílalestina til að taka í hendur aðdáenda, og þá sérstaklega á fallegum konum en Kennedy forseti var kvennamaður mikill.
Hver var á hinni línunni?
Þegar að símtalið við konuna hafði verið um það bil hálfnað heyrðist starfsmanni neyðarlínunnar hún leggja niður tólið og hringja úr öðrum síma. Starfsmaðurinn hafði spurt hvort allt væri í lagi en hún svarað að hún væri að tala við annan en laus eftir augnablik. Þegar hún hóf aftur að tala við starfsmann neyðarlínunnar breytti hún tímasetningunni á dauða forsetans frá 10:10 til 10:30.
Við hvern hafði konan talað? Og hvernig vissi hún að Kennedy var á eftir áætlun?
Nefnd sem rannsakaði morðið á Kennedy komst að þeirri niðurstöðu að Oswald hefði staðið einn að morðinu og ekki haft neina samverkamenn. Því var símtalið aldrei rannsakað frekar.
Mafían að baki morðinu?
En enn eru uppi samsæriskenningar um morðið á Kennedy og margir sem efast um niðurstöður nefndarinnar. Sumir halda að konan hafi verið leikkonan Karyn Kupcinet, sem fannst látin á heimili sínu sex dögum eftir morðið. Samkvæmt þeirri kenningu vissi Karyn af áætluninni um að myrða Kennedy þar sem faðir hennar var besti vinur Jack Ruby, mannsins sem skaut Oswald til bana.
Ruby átti næturklúbba og strippbúllur og mun hafa verið viðriðinn alls kyns skipulagða glæpastarfsemi. Segja þeir, er trúa á þessa kenningu, að Ruby hafi skotið Oswald til að þagga niður í honum og tryggja þar með að aldrei kæmist upp að mafían hefði í raun staðið að baki morðinu,
En sú kenning er vafasöm og langlíklegast að konan í símanum hafi verið einhver furðufugl. En á móti kemur að það tókst aldrei að finna út hvað varð hinni ungu og hraustu Karyn að bana.
Símtalið er og verður ráðgáta.
