Stiklan fyrir stórmynd Netflix, Heart of Stone, var birt í gær, en um er að ræða stærsta erlenda kvikmyndaverkefnið til þessa í sögu Reykjavíkur. Hluti miðborgarinnar var lokaður í fjóra daga í byrjun apríl í fyrra þegar tökur fóru fram við Hörpu, Sæbraut og á götum kringum Skólavörðuholt. Tökur fóru einnig fram á landsbyggðinni og nýtur borgin og íslenskt landslag sín vel í stiklunni. Harpa springur meðal annars með miklum tilþrifum.
Stórstjörnurnar Gal Gadot, Jamie Dorman, Alia Bhatt, Sophie Okonedo, Matthias Schweighöfer, Jing Lusi og Paul Ready fara með aðalhlutverkin. Um 600 manns munu hafa verið í tökuliði myndarinnar hérlendis og aukaleikarar um 400 talsins.
Heart of Stone stikla
Myndin er sú fyrsta í nýrri hasarmyndaröð sem fjalla um leyniþjónustukonuna Rachel Stone, sem Gadot leikur, en í fyrstu myndinni er hún í kapphlaupi við tímann um að stöðva tölvuþrjót sem stela vill verðmætustu og um leið hættulegustu eign alþjóðlegra friðarsamtaka.
Um helmingur íslenskra heimila er með aðgang að Netflix og því ættu margir að geta horft á myndina þegar hún kemur út 11. ágúst.
