Hjónin Karitas Sveinsdóttir og Hafsteinn Júlíusson eigendur hönnunarstúdíósins Haf studio hafa keypt draumaeignina í Þingholtunum, Fjölnisveg 14 í Reykjavík.

„Staðsetningin, húsið sjálft og garðurinn seldi okkur þetta. Eftir að við fengum að skoða húsið að innan urðum við ennþá spenntari. Við fundum góðan anda og sáum strax möguleikana sem við gætum gert til að gera húsið að okkar draumaheimili. Fyrri eigendur bjuggu í húsinu í rúm fjörutíu ár og hlakkar okkur mikið til taka við eigninni og viðhalda notalegum stundum þar inni,” segir Karitas í samtali við Vísi. 

Húsið er 306 fermetrar að stærð á þremur hæðum, byggt árið 1934, við húsið stendur 35 fermetra bílskúr og stór og rótgróinn garður.

Hjónin eiga tvær dætur og seldu nýlega hús sitt við Laufásveg 25 þar sem þau bjuggu í þrjú ár. Húsið var byggt árið 1916 og með sögurfrægt, en Nóbelsskáldið Halldór Laxness bjó þar á árunum 1930-1939. Hjónin gerðu húsið upp á nútímalegan máta, en leyfðu samt sjarma hússins að njóta sín og fengu loftlistar og rósettur fengu að standa. 

Sjá einnig: HAF STUDIO hjónin selja sögufrægt hús

„Við elskum að vera í Þingholtunum og vildum halda okkur innan hverfisins. Við erum óskaplega spennt að fá stærri garð, sem hefur verið nostrað fallega við síðastliðin ár, þar sem við elskum útiveru og garðvinnu. Auk þess er garðskáli og nokkrir auka fermetrar sem er líka æðislegt,” segir Karitas en hjónin ætla að halda í tíðaranda hússins. 

„Við ætlum gera mið- og efstu hæð hússins meira að okkar með því að skipta út gólefnum, baðherbergjum og eldhúsi en halda í upprunalega klassík.”