Næringarfræðingurinn Elísabet Reynisdóttir, betur þekkt sem Beta Reynis, segir að tilbúnir réttir sem fást í matvöruverslunum séu ekki svo óhollir.
Hún ræddi um málið í Bítinu á Bylgjunni í morgun.
„Margt af þessu er bara allt í lagi. Ég skoðaði eitthvað af þessum tegundum sem eru tilbúnar, þetta er allt í lagi. Sumir stoppa á skyndibitastöðum og kaupa sér mat, ég myndi alltaf velja þennan kostinn. En svo er spurnin: Hvert erum við að fara? Erum við að hætta að elda? Þetta er ekki svona flókið [að elda],“ segir hún.
„Við viljum ekki þurfa að hugsa um hvað á að vera í matinn, hvernig á að elda hann. Við erum komin í frekar skrýtin feril finnst mér.“
Elísabet útskýrði einfalda leið til að lesa innihaldslýsingu á tilbúnum réttum.
„Þegar þið skoðið innihaldslýsingu þá er alltaf mest af því sem er talið upp fyrst og svo koll af kolli. Í einhverjum einum rétt af Tikka Masala hjá einhverjum var sykur númer fjögur, sem þýðir að það er svolítið mikill sykur í matnum,“ segir hún.
„Því miður, þó það sé mikið salt, þá þurfa þeir ekki að telja það upp því ef það fer ekki yfir 5 prósent af innihaldinu þá þarf ekki að telja það upp. Oft er þetta ansi salt,“ segir hún og bætir við að hún viti ekki hvað fólk geri heima hjá sér og hversu mikið það salti matinn.
Elísabet segir að það sé betra að kaupa svona tilbúna rétti heldur en að borða pylsur.
„Þetta er betra en þú myndir kaupa pylsur og sjóða heima eða einhvern annan svoleiðis tilbúinn mat. Ég er meira að vara fólk við tilbúnum mat sem er mjög saltaður og með mikið af aukaefnum. En ef þetta er hreinn matur,“ segir hún.
Næringarfræðingurinn viðurkennir að fyrir suma er ekkert mál að borða svona mat – með mikið af sykri, salti og kolvetnum – og þeir þoli hann vel, en fyrir aðra kemur þetta meltingunni í uppnám.
„Þetta er mjög einstaklingsbundið. Við þurfum að meta hvernig okkur líður af svona mat,“ segir hún.
Hlustaðu á viðtalið við Elísabetu hér að neðan.
