Bandarískir slúðurmiðlar greina frá því að Lynne Spears, móðir Britney, hafi flogið til Los Angeles í gær til að hitta dóttur sína. Það þykir nokkrum tíðindum sæta enda hefur stórstjarnan iðulega gagnrýnt móður sína harðlega og hermt er að þær hafi ekki talast við í mörg ár.

Nú er möguleiki að einhverskonar sættir séu að nást en Lynne var sótt á flugvöllin af Cade Hudson, umboðsmanni Britney, en þaðan keyrðu þau að að heimili Britney sem tók á móti móður sinni og vörðu þær um 30 mínútum saman en eiginmaður stjörnunnar, Sam Asghari, var einnig viðstaddur.

Heimsóknin þykir benda til þess að þíða sé komin í samband mæðgnanna en hermt er að þær hafi sent smáskilaboð á milli sín undanfarin misseri.

Eins og frægt varð var Britney Spears í rúman áratug svipt sjálfræði sínu fyrir tilstuðlan fjölskyldu hennar sem taldi hana glíma við of alvarleg andleg veikindi til að geta borði ábyrgð á eigið lífi.. Vegna þessa hafði söngkonan ekki forræði á auðæfum sínum, frítíma, atvinnu og varla sjálfsákvörðunarrétt yfir eigin líkama.

Britney hefur borið móður sína þungum sökum vegna þessa og reglulega gagnrýnt hana í fjölmiðlum. Lynne hefur hins vegar svarað því með því sað segjast elska dóttur sína og óskað þess að komast í samband við hana að nýju. Nú eygir hún loks von.