Leikarinn Robert De Niro var að eignast sitt sjöunda barn. Leikarinn er 79 ára en þrátt fyrir að fregnirnar um stækkandi fjölskyldu hans hafi komið mörgum aðdáendum hans á óvart, kom það ekki honum á óvart.

Á þriðjudaginn mætti leikarinn á frumsýningu About My Father og svaraði spurningum fjölmiðla. Page Six spurði hvort hann hafi verið hissa að verða faðir aftur, orðinn 79 ára. Hann svaraði einfaldlega: „Nei.“

Hann bætti við að barnið hafi verið planað. „Hvernig geturðu ekki planað svona lagað?“ sagði hann svo.

Fyrr um daginn höfðu talsmenn stjörnunnar greint frá því að hann hafi eignast annað barn en hvorki kyn barnsins né nafn móður barnsins kom fram í tilkynningunni. En kærasta De Niro, Tiffany Chen, sást í síðasta mánuði með óléttukúlu.

Þau hafa farið leynt með samband sitt en Chen er tæplega 25 árum yngri en leikarinn. Parið kynntist við tökur á kvikmyndinni The Intern.