Pálmi Ragnar Ásgeirsson lagahöfundur og upptökustjóri lagsins Power ásamt Dilja Pétursdóttur er gestur Einars Bárðar í nýjasta þætti af hlaðvarpinu Einmitt.Pálmi er einn sá reyndasti í faginu og síðustu tíu ár hefur hann átt þátt í mörgum vinsælustu lögum landsins. Hann og Diljá hafa unnið saman síðustu fjögur ár en Pálmi er þekktur fyrir farsælt samstarf við fjölda listamanna og nægir þar að nefna samstarf hans og Bríetar. 

Meira en áratugur í fremstu víglínu 

Árið 2015 áttu Pálmi, Ásgeir bróðir hans og Sæþór Kristjánsson tvö efstu lögin í Eurovision keppninni á Íslandi. Þeir félagar áttu mýmörg vinsæl lög á þeim árum bæði hér heima og erlendis en þeir voru á forlagssamningi hjá erlendu plötufyrirtæki.  Pálmi gerði sig líklegan til að taka þátt í keppninni hér heima aftur nokkrum árum síðar en hætti við og gagnrýndi fyrirkomulag samningsins sem höfundum laganna bauðst hjá RÚV. Í samtalinu við Einar segir Pálmi það umhverfi hafa breyst til hins betra og að keppnin vaxi ár frá ári. 

Dilja býr yfir sjaldgæfu og sterku viðhorfi 

Pálmi er að sjálfsögðu kominn til Liverpool en þátturinn var tekinn upp rétt áður en þau flugu. Aðspurður um samstarf sitt og væntingar sínar til Diljár segir hann að Diljá búi yfir mjög sjaldgæfu en sterku viðhorfi gagnvart verkefninu sem þessi keppni er sem er sjaldgæft og hvað þá fyrir 21 árs manneskju.

„Ég er ekki að segja að þetta verði ekki erfitt fyrir hana en hún er bara búin að staðsetja sig þannig gagnvart verkefninu.“

Milljón breytur þarna úti sem þú ræður ekki

„Ég fer bara inn í þetta þannig að ég veit að lagið er gott, ég veit að við erum að gera þetta eins vel og við getum og RÚV er að vinna þetta af miklum krafti með okkur. En til þess að maður fari sæmilega heill út úr þessu þarf maður að stilla sig gagnvart væntingunum. Þannig að þrátt fyrir að allir séu að vinna að sama markmiði þá er þetta bara eitt lag í fjörutíu laga potti og það eru milljón breytur þarna úti sem stýra því hvernig þetta fer,“ segir Pálmi aðspurður um sínar væntingar. 

Loreen er örugglega að fara að jarða þetta  

Þá berst talið að því hverjir er líklegastir sem sigurvegarar á laugardaginn. Pálmi nefnir Finna til leiks og þá sé alltaf erfitt að afskrifa Úkraínu en þá sé það samt þannig að að Loreen sé líkast til að fara að  „ jarða þetta.“

„Mér finnst hún vera með besta lagið í keppninni, hún er klárlega einn besti flytjandinn og atriðið er flottari en öll atriðin.“

Hægt er að hlusta á þáttinn í heild sinni hér.