Ragnhildur Þórðardóttir, betur þekkt sem Ragga nagli, fjallar í sinni nýjustu færslu á Facebook um útlitssmánun. Tilefni færslunnar er færsla Nínu Richter, fjölmiðlakonu á Hringbraut, sem hún skrifaði eftir að hafa fengið ljót skilaboð frá nafngreindum aðila.
Sjónvarpskonan Nína Richter tók netníðing til bæna – „Í dag geta svona orð ekki sært mig“
Í pistli sínum kemur Ragga inn á að við komum með óumbeðið álit á útliti kollega, vinafólks, systkina. Hvetur Ragga fólk til að taka ekki þátt í útlitssmánun og „vera þannig einn Legókubbur í að byggja betri framtíð þar sem við einblínum á manneskjuna en ekki hylkið sem hýsir hana.“
Færslan Röggu fer hér á eftir í heild sinni:
„Gullfalleg kona á sjónvarpsskjánum er útlitssmánuð af einhverjum sem hafði stórkostlega ranghugmynd að eftirspurn væri eftir hans áliti.
Hún henti í hugrakkan pistil og vakti athygli almennings á hatursorðræðunni sem því miður grasserar á netinu eins og njóli á fjósvegg.
Það er merkilegt hvað tærnar kreppast víða og þörfin fyrir að hamra á lyklaborðið níð og niðurrif í felum bakvið tölvuskjá.
„Sjáðu nefið á manninum“
„Þessi flýgur á eyrunum eins og Dúmbó“
„Ekki hægt að taka konuna alvarlega svona smámælta“
„Af hverju fer manneskjan ekki í laser með þessa valbrá“
„Alltof grannur“
„Alltof feitur“
Við komum með óumbeðið álit á útliti kollega, vinafólks, systkina.
Þegar við erum dugleg í ræktinni.
„Ekki kvenlegt að vera með svona stóra vöðva“
Þegar við spörslum í hrukkurnar og mökum lit á augnlokin.
„Rosalega ertu mikið máluð. Kann betur við þig náttúrulegri“
Þegar við sleppum farðanum.
„Ertu kvefuð, nefið á þér er svo rautt“
Þegar við ákveðum að vera maskaralaus.
„Ertu lasin? Þú ert svo þreytuleg“
Þegar við gúffuðum of mikið brauð í gær
„Hvað ertu komin marga mánuði á leið?“
Útlitið skilgreinir ekki virði okkar sem manneskjur.
Mörg húðflúr hamla þér ekki að halda í höndina á börnunum þínum.
Útstæð eyru hindra þig ekki í að hlusta og hugga vinkonu í hjónabandserfiðleikum.
Skakkar tennur stoppa þig ekki í að ausa hrósyrðum yfir vin þinn.
Bólur á kinn eru engin fyrirstaða fyrir að sýna samferðarfólki þínu samkennd og samhyggð.
Er feitur, bólugrafinn, tattúveraður, eyrnastór eða rauðnefjaður virkilega það versta sem mannskepna getur verið?
Er skarð í vör eitthvað sem við þurfum að hafa orð á?
Er ekki mun verra að baktala, rífa niður, skilja útundan, gaslýsa, samviskubitsvæða, vera afbrýðissamur, illa innrættur og sjálfhverfur?
Er manneskjan skilningsrík, forvitin, hugmyndarík, áhugasöm, með háa samkennd, hlýja nærveru og kímnigáfu?
Verum fyrirmynd fyrir komandi kynslóð og fögnum fjölbreytileika í mannlegu útliti og normalíserum allskonar liti og lögun, smetti og skrokka.
Hafðu hugrekki til að taka ekki þátt í útlitssmánun og vera þannig einn Legókubbur í að byggja betri framtíð þar sem við einblínum á manneskjuna en ekki hylkið sem hýsir hana.
