RIFF beinir sérstakri athygli að vaxandi vinsældum hryllingsmynda frá samfélögum Inúíta í ár. Flokkurinn, Inúítahryllingsmyndir og stuttmyndir, tekur til fjölda mynda og stuttmynda sem snúa að lífsaðstæðum við margslungið og hættulegt umhverfi.
RIFF 2022 fer fram dagana 29. september til 9. október í Háskólabíói. Þetta er í nítjánda skipti sem hátíðin er haldin en hún hefur skipað sér á bás sem ein eftirsóttasta kvikmyndahátíð Norðurlanda.
Í tilkynningu frá RIFF segir að grunninn í hryllingsmyndum Inúíta megi finna í hefðbundnum uppeldisaðferðum hirðingjasamfélagsins.
Mikilvægi þess að vara börn og ungmenni við hættum umhverfisins var uppspretta fjölda sagna um skrímsli sem bjuggu allt um kring. Skrímslið í hafinu tekur börn og ber þau niður í djúpin til sín og þaðan á enginn afturkvæmt. Norðurljósin dansa um með höfuð þeirra barna sem nota ekki húfur og sparka á milli sín eins og fótbolta.
Með því að koma skilaboðum um hættur umhverfisins til barnanna með sögum er engin þörf á því að skamma börn, garga á þau eða refsa þeim. Þau læra að þekkja hætturnar með sögunum sem þau drekka í sig með móðurmjólkinni. …
Í aldanna rás hafa konur notað skrímslin til að varða leiðina og því rökrétt að sagnaarfurinn brjóti sér leið með kvenkyns leikstjórum í kvikmyndagerð nútímans.
Leikstjórarnir Nyla Innuksuk og Kirsten Carthew tilheyra þessum hópi kvikmyndagerðafólks og stuttmyndir í leikstjórn Jennie Williams og Mariu Fredriksson verða einnig sýndar á RIFF 2022. Sérstakar umræður verða um hryllingsmyndir norðurskautsins, stýrt af Cass Gardiner og Nyla Innuksuk mun taka þátt í þeim.
Inúítahryllingsmyndir og stuttmyndir / Inuit Chills & Thrills
Maika og töffararnir vinkonur hennar uppgötva innrás geimvera í pínulitla heimskautaþorpinu sínu. Það er undir þeim komið að berjast á móti og stöðva innrásina. Þær nota bráðabirgðavopn og þekkingu sína á hryllingsmyndum til að kenna geimverunum mikilvægan boðskap: Ekki abbast upp á stelpurnar frá Pang!
Myndin fjallar um unga stúlku, sem hefur verið alin upp af ísbirni, og þarf að takast á við hóp grimmra stríðsmanna sem eru staðráðnir í að drepa fóstru hennar. Sögusviðið er ískaldur heimur hins eilífa veturs, arfur vanvirðingar fyrri kynslóða, þar sem lífið er ógeðfellt. grimmdarlegt og stutt.
Nalujuk-kvöldið / Nalujuk Night
Snjórinn brakar undir fótum Nalujuks á hafísnum við inúítasamfélagið Nain á Labrador. Um Nunatsiavut-nóttina, á þrettándanum á hverju ári, birtast þessar ógnvænlegu verur í kaldri vetrarnóttinni, klæddar dýrafeldum, selskinnsstígvélum og með grímur. Þeir ganga á tveimur fótum, en andlit þeirra eru dýrsleg. Ógnin sem fylgir komu þeirra er áþreifanleg og þeir elta börnin í þorpinu á svimandi hraða. Þau syngja sér til vægðar og lofa því að hafa verið góð. Þessari þrettánda hefð eru gerð falleg skil í mynd Jennie Williams um samfélag sem fagnar saman menningu og hefðum.
Mahaha
Babah Kalluk (Inuk) CA, 2020, 12 min
Þegar faðir Aulaja fer í veiðitúr hunsar hún áminningu hans um að vera varkár. Aulaja skilur verndarsleðahundinn Siku eftir þegar hún fer á fiskveiðar en þá er ráðist á hana af fornum anda landsins. Til að hún eigi einhverja lífsvon verður að færa fórn.
Nagdýr grjótsins / Gnawer of Rocks
Andrea Flaherty CA, 2020 13 min
Á meðan allir eru uppteknir við að undirbúa komandi vetur, ráfa tvær stelpur í burtu frá tjaldbúðunum og fylgja stíg úr framandi og fallegum steinum. En friðsæli göngutúrinn breytist fljótlega í hættuför þegar stelpurnar festast í helli Mangittatuarjuk, nagdýri grjótsins.
Lærlingur sjamansins / ANGAKUSAJAUJUQ
Zacharias Kunuk (Inuk) Canada, 21 min,
Ung kona sem er að læra visku sjamansins fer í gegnum sitt fyrsta próf, ferðalag til að hitta drottnara undirheimanna, Kannaaluk. Einn úr samfélaginu hefur veikst og lækninguna er að finna á þessum skuggaslóðum. Lærlingur sjamansins stendur frammi fyrir myrkum öndum auk líkamlegra áskorana og hún þarf að treysta á kenningar leiðbeinanda síns og læra að stjórna óttanum.
