Hollywood-stjarnan Paul Rudd er ekki bara vinalegur á hvíta tjaldinu heldur virðist hann vera hreinræktað góðmenni. Leikarinn frétti af því að hinn 12 ára gamli Brody Ridder hafði orðið fyrir því að bekkjarfélagar hans neituðu allir að kvitta í árbókina hans eins og hefð er fyrir í bandarískum skólum.

Færsla móður Ridder vakti athygli á samfélagsmiðlum sem og átakanleg skilaboð sem drengurinn hafði skrifað til sjálfs sín þar sem hann sagðist vonast til þess að hann myndi eignast fleiri vini í framtíðinni.

Drengurinn er mikill aðdáandi Rudd og þegar leikarinn hafði veður af málinu þá hafði hann þegar samband við fjölskyldu drengsins og skipulagði Facetime-símtal þeirra á milli. Þá skrifaði hann Ridder litla bréf og sendi honum áritaðan Ant-Man hjálm en ofurhetjan, sem Rudd leikur, er í miklu uppáhaldi hjá drengnum.

„Það var frábært að tala við þig um daginn. Það er mikilvægt að muna að jafnvel þegar lífið er erfitt þá mun rofa til. Það eru svo margir sem elska þig og finnst þú vera frábær – ég er einn af þeim. Ég get ekki beðið eftir því hvaða frábæru hluti þú munt áorka í framtíðinni, skrifaði Rudd til drengsins en móðir Ridder deildi skilaboðum Rudd á samfélagsmiðla.