Eign dagsins hér á DV er að þessu sinni Urðarbrunnur 74 en hún var nýlega sett á sölu og er uppsett verð á henni 139.900.000 krónur. Um er að ræða afar glæsilegt 211,6 fermetra parhús á tveimur hæðumí Úlfarsárdalnum í Grafarvoginum í Reykjavík.

Hreiðar Levý Guðmundsson, fasteignasali hjá Öldu fasteignasölu, er með eignina í sölu hjá sér en hann segir í samtali við DV að fjölskyldan sem býr nú í húsinu hafi byggt húsið sjálf árið 2016. Nú hefur fjölskyldan ákveðið að selja húsið en þau ætla að flytja í annað hús sem þau eru einnig að byggja sjálf. Ljóst er því að um afar framkvæmdaglaða fjölskyldu er að ræða.

„Frábær staðsetning, þetta er rétt hjá nýja skólanum, íþróttasvæðinu, sundlauginni og öllu. Svo er fallegt útsýni út á Úlfarsárdalinn. Þetta er mjög góð eign, flott stofa, hátt til loft, beint útgengi út í garð og fjögur svefnherbergi. Þetta er gríðarlega góð fjölskyldueign sem búið er að búa í lengi,“ segir Hreiðar Levý og bætir svo við að það sé gólfhiti í öllu húsinu.

Í lýsingu á eigninni á Fasteignaleitinni kemur fram að góð aðkoma sé að húsinu með hellulögðu bílaplani fyrir framan inngang og bílskúr, sem er 31,5 fermetrar að stærð. Á fyrstu hæðinni er að finna gestasalerni, stórt alrými með samliggjandi stofu, borðstofu og eldhúsi en aukin lofthæð er í alrýminu og útgengt er í „sólríkan og rúmgóðan“ garð úr því.

Á annarri hæðinni er svo sjónvarpshol og fjögur svefnherbergi, þar með talið er hjónaherbergi með sér fataherbergi. Á efri hæðinni er einnig að finna baðherbergi og þvottahús.

Hér fyrir neðan má sjá nokkrar myndir af eigninni en fleiri myndir og frekari upplýsingar er að finna á Fasteignaleitinni.