Í júlí 1967 var ljósmyndarinn Rocco Morabito á leið í verkefni til að mynda verkfallsaðgerðir lestarstarfsmanna í Jacksonville í Flórída.
Á leið sinni ók hann framhjá hópi manna frá rafveitunni sem voru við vanabundin eftirlitsstörf við rafmagnsstaura borgarinna. Þegar að ljósmyndarinn ók til baka voru mennirnir enn við störf og þar sem Morabito hafði tíma að drepa ákvað hann að staldra við og smella af þeim nokkrum myndum. Þegar hann var við að stíga út úr bílnum heyrði hann aftur á móti neyðaröskur og varð samstundis ljóst að eitthvað hræðilegt hafði gerst.
4000 volt
Á toppi rafmagnsstaursins hafði Randall G. Champion verið við vinnu þegar hann rak sig í rafmagnslínur sem ekki höfðu verið teknar úr sambandi við vinnu viðgerðarmannanna. Hann missti meðvitund augnablikið sem 4000 volta rafmagnsstraumurinn barst um líkama hans.
Öryggisbeltið kom í veg fyrir að hann félli til jarðar en þess í stað hékk hann rænulaus á hvolfi rétt við aðrar virkar rafmagnslínur og ljóst var að ekki mátti miklu muna. Morabito var með talstöð í bíl sínum og kallaði tafarlaust eftir sjúkrabíll.
Eldsnögg ákvörðun
Annar starfsmaður rafveitunnar, JD Thompson, var við störf við annan staur um 150 metrum frá og hljóp hann sem fætur toguðu að staurnum þar sem Champion lá hangandi. Thompson hikaði ekki sekúndu heldur kleyf upp staurinn á örskotsstundu en varð ljóst að vinnufélagi hans var helblár og andaði ekki.
Ekki var heldur neinn púls að finna. Hann greip því til þess ráðs að losa axlashaftið af Champion, koma honum fyrir á öxl sér og blása í hann súrefni auk þess að berja reglulega á brjóst hans þar til hann fann hjartsláttinn snúa aftur. Vinnufélagarnir gátu lítið annað gert en að fylgjast með en Morabito tók upp myndavélina og smellti myndum af örvæntingarfullri tilraun Thompson til að bjarga lífi vinar síns. Þegar Thompson var þess viss að hjartsláttur og öndun Champion væru orðin þokkalega stöðug losaði hann félaga sinn úr öryggisbúnaðinum og bar hann á öxlinni niður þar sem vinnufélagarnir biðu til að veita Champion hjartahnoð þar til sjúkrabíll bærist.
Rocco Morabito ók aftur á móti eins hratt og hann gat aftur á ritstjórn blaðs síns og var prentun frestað svo unnt væri að framkalla myndina sem birt var á síðum blaða morgunin eftir. JD Thompson var hylltur sem hetja, titill sem honum fannst alltaf óþægilegur.
Heimsfrægð
Þökk sé viðbragðsflýti og snöggrar ákvarðanatöku JD Thompson komst Randall G. Champion til fullrar heilsu og störfuðu þeir félagar hjá rafveitunni í þrjátíu ár til viðbótar. Champion var þó ekki alveg laus við rafmagnsslysin því árið 1991 fékk hann í sig 26 000 volta straum sem brenndi af honum varirnar og hluta nefs og ennis. Thompson var þá yfirmaður hans og tók hann slysið afar nærri sér. Champion lamaðist en náði aftur nokkurri hreyfigetu áður en hann lét formlega af störfum hjá rafmagnsveitunni árið 1993. Hann lést árið 2002, 64 ára að aldri.
Rocco Morabito fékk Pulitzer verðlaun fyrir myndina af þeim félögum sem hlaut nafnið ,,Kiss of Life”. Myndin gerði þremenningana heimsfræga og mokaði ljósmyndin að sér verðlaunum. Morabito átti farsælan feril sem ljósmyndari allt þar til hann settist í helgan stein árið 1982. Hann lést í hárri elli árið 2009. Champion og Thompson héldu vináttu við Morabito alla tíð eftir slysið.
JD Thompson vann hjá rafveitunni þar til hann fór á eftirlaun. Hann býr enn í hárri elli í Flórída.
