Áhrifavaldurinn Alexsandra Bernharð tjáir sig í fyrsta skipti eftir að ummæli vinkonu hennar, Þórunnar Ívarsdóttur, í garð hennar fóru eins og eldur í sinu um netheima. Alexsandra segist ekki skulda neinum yfirlýsingu og að hún sé að reyna að meðtaka allt sem hefur átt sér stað síðastliðinn sólahring.

Sjá einnig: Helgi Ómars segir íslenskan áhrifvald beita andlegu ofbeldi í hlaðvarpi – „Loksins sagði einhver eitthvað!“

Ljósmyndarinn og bloggarinn Helgi Ómarsson vakti athygli á ummælunum á Instagram í gær og birti nokkur hljóðbrot úr hlaðvarpsþætti Alexsöndru og Þórunnar, Þokan. Í hljóðbrotunum má heyra Þórunni meðal annars segja við vinkonu sína að hún sé í „engu formi,“ sé illa gift og eigi enga peninga.

„Ég ætlaði nú ekki að fara að tjá mig neitt, en þar sem ég er að fá skilaboð og símtöl frá blaðamönnum að spyrja mig af hverju ég hef ekki sagt neitt þá finn ég mig knúna til að segja eitt,“ segir Alexsandra og heldur áfram:

„Ég skulda engum að koma með neina yfirlýsingu. Ég er að reyna að meðtaka allt sem hefur átt sér stað seinasta sólarhring og þarf minn tíma og rými til þess.“

Sjá einnig: Þórunn Ívars rýfur þögnina – „Ég er brotin yfir því að ég hafi leyft mér að koma svona fram“

Þórunn Ívars baðst afsökunar í gærkvöldi en eyddi færslunum stuttu seinna. Hún sagðist vera brotin yfir því að hafa leyft sér að koma svona fram við vinkonu sína og sagði að samband þeirra væri náið og flókið. Þórunn sagði einnig að „svipaðir hlutir“ hafa verið sagðir við hana í Þokunni en það hefði ekki ratað í útgefinn þátt.