Steve Carter hafði alltaf vitað að hann hafði verið ættleiddur. Steve Carter hafði verið í hernum, staðsettur í Hawaí og dreymdi hann og Pat konu hans um að eignast börn en aldrei varð Pat ófrísk. Þau ákváðu því að ættleiða og heimsóttu munaðarleysingjahæli í Honolulu og þegar þau rákust á fallegan og fjörugan fjögurra ára dreng var um að ræða ást við fyrstu sýn. Steve hlaut ástríkt uppeldi hjá Carter hjónunum í New Jersey fylki í Bandaríkjunum, stóð sig vel í skóla og átti stóran vinahóp.
Samt sem áður blundaði ávallt i honum löngunin til að vita meira um uppruna sinn.
Tansin Takeno
Steve gekk í hjónaband upp úr þrítugu og byrjuðu ungu hjónin að ræða barneignir. Barneignatalið jók mjög á löngun Steve til að finna upplýsingar um blóðforeldra sína. Carter hjónin vildu allt til gera að aðstoða en höfðu ekki fengið neinar upplýsingar frá munaðarleysingjahælinu annað en hann var nefndur Tansin Takeno.
Árið 2011 varð sannkölluð fréttasprengja í Bandaríkjunum þegar að kona að nafni Carlina White komst að því að henni hefði verið rænt sem ungabarni af fæðingadeild. Steve var orðinn 35 ára og saga Carlinu varð til þess að hann lagðist í leit að uppruna sínum. Það tók hann ekki lengi að finna myndir af dreng að nafni Marx Panama Barnes á síðunni www.missingkids.com. Önnur var af drengnum sem 6 mánaða ungabarni og hin tölvugerð, eins og talið var að hann hefði litið út sem táningur.
Steve sagði síðar að hann hefði fengið hroll. ,,Það var enginn vafi, þetta var ég.”
Leitaði í tvö ár
Steve komst að því að hann var fæddur í Hau’ula á Hawaí, sonur Mark Barnes og Charlotte Moriarty, og var hann nefndur Marx Panama Moriarty Barnes. Charlotte var að mörgu leyti óhefðbundin móðir og og átti það til að hverfa svo dögum skipti og dvaldi þá í hinum ýmsu kommúnum. Hún skilaði sér alltaf aftur heim þar sem eiginmaður hennar beið þolinmóður. Dag einn tók hún Marx lita út í göngutúr en kom ekki til baka. Mark var rólegur fyrstu dagana því Charlotte var vinmörg og áleit hann hana vera í heimsókn hjá einhverjum þeirra. En dagarnir liðu og ekki bólaði á Charlotte né ungabarninu. Mark fylltist ótta og fór til lögreglu sem þegar hóf leit að mæðginunum. Kerra barnsins fannst við strætóstoppustöð en það var sem Charlotte og Marx litli hefðu gufað upp af yfirborði jarðar. Mark leitaði að þeim ljósum logum um allan eyjaklasann næstu tvö árin, án árangur. Á endanum sætti hans við þá hugsun að þau væru að öllum líkindum látin. Það sem Mark vissi ekki var að sonur hans var á þeim tíma á munaðarleysingjahæli í innan við 50 km fjarlægð frá heimili hans.
Móðirin sem hvarf
Þrjátíu árum síðar kom sannleikurinn í ljós. Charlotte hafði brotist inn í hús með barnið og þegar eigendurnir komu heim og sáu að Charlotte hafði gert sig heimakomna hringdu þeir umsvifalaust á lögreglu. Charlotte gaf upp röng nöfn á þeim mæðginum, kvað þau heita Charlene og Tansin Takeno, og því fundust engir ættingjar þrátt fyrir ítarlega leit. Hegðun Charlotte varð sífellt undarlegri meðan hún var í umsjón yfirvalda og þegar lögregla gafst upp á að finna aðstandendur var Charlotte send á geðdeild en barninu komið fyrir á munaðarleysingjahæli. Charlotte útskrifaði sig sjálfa af deildinni nokkrum dögum síðar og hefur aldrei fundist síðan.
Steve fór í DNA próf sem sannaði í eitt skipti fyrir öll að hann var Marx Panama Moriarty Barnes.
Ári síðar komst Steve í samband við föður sinn og hálfsystur, Jennifer, sem var dóttir Charlotte. Charlotte hafði yfirgefið hana og föður hennar þegar hún hitti Mark og varð ófrísk af Steve. Hún var þá átta ára gömul.
Sennilega hefði Steve aldrei komist af sannleikanum ef ekki hefði verið fyrir Jennifer. Hún hafði aldrei gleymt að hún ætti lítinn bróður sem hafði horfið og hélt alltaf í þá von að hún myndi finna hann aftur. Þegar Jennifer komst á fullorðinsár fór hún til lögreglu og sannfærði þá um að opna málið sem hún fékk í gegn árið 2001. Hún átti þessa einu mynd af litla bróður sínum og varð hún til þess að Steve komst loksins að uppruna sínum. Steve er í dag í góðum samskiptum við líffræðilega ættingja sína en segist ávallt munu líta á Carter hjónin sem sína raunverulegu foreldra. Charlotte er enn skráð sem týnd og hefur ekkert til hennar spurst.
