Linda Evangelista, 56 ára, var ein frægasta og eftirsóttasta ofurfyrirsæta tíunda áratugsins. Hún kom fram í ótal herferðum, gekk niður tískupalla fyrir stærstu merki heims, var á forsíðum Vogue og svo má ekki gleyma fræga George Michael tónlistarmyndbandinu sem hún lék í ásamt Naomi Campbell, Cindy Crawford og Christy Turlington.
En á meðan starfssystur hennar hafa haldið áfram að vinna í iðnaðinum hefur Linda látið lítið fyrir sér fara undanfarin ár. Hún greindi frá ástæðu þess í tilfinningaþrungnum pistli á Instagram í september í fyrra.
Hún sagði að vinsæl fegrunaraðgerð hefði afmyndað hana í framan fyrir rúmlega fimm árum síðan en hún ætlar sér að lögsækja fyrirtækið sem ber ábyrgð á aðgerðinni. Um er að ræða algenga og vinsæla fituminnkandi fegrunaraðgerð sem kallast CoolSculpting.
Hún sagði að aðgerðin hefði skilið hana eftir afmyndaða til frambúðar, eyðilagða á líkama og sál. Þetta hafi orðið til þess að hún er eins konar einsetukona í dag.
Nú ætlar Linda að vera ekki lengur í felum og birtir tímaritið People fyrstu myndirnar af líkama hennar eftir aðgerðina.
„Ég er hætt að fela mig,“ segir hún í forsíðuviðtali People.
Hún opnar sig um tilfinningalega og líkamlega sársaukann sem hún hefur þurft að upplifa undanfarin ár og líkir þeim við martröð.
„Ég elskaði að ganga niður tískupallana, en nú hryllir mér við því að rekast á einhvern sem ég þekki,“ segir hún tárvot í framan samkvæmt People.
„Ég get ekki lifað svona lengur, í felum og skömm. Ég bara get ekki lifað með þessum sársauka lengur og er loksins tilbúin að tala.“
Viðtalið og myndirnar má sjá hér.
Eins og fyrr segir opnaði fyrrverandi ofurfyrirsætan sig um þetta fyrst í fyrra. Hún hélt því fram að í stað þess að minnka fitu hafi aðgerðin fjölgað fitufrumum og „skilið mig eftir afmyndaða til frambúðar, þrátt fyrir að hafa gengið í gegnum tvær sársaukafullar leiðréttingaraðgerðir sem virkuðu ekki. Eins og fjölmiðlar hafa sagt þá er ég „óþekkjanleg.“
„Ég hef þróað með mér Paradoxical Adipose Hyperplasia eða PAH. Áhætta sem ég var ekki látin vita af fyrir aðgerðina,“ sagði hún.
Hún sagði PAH ekki aðeins hafa rústað lífsviðurværi hennar heldur valdið þunglyndi og því að hún elur nú á miklu sjálfshatri.
Linda hefur kært Zeltiq Aesthetics Inc og krefst rúmlega sex milljarða króna í skaðabætur.
