Í þættinum Matur og heimili á Hringbraut í kvöld heimsækir Sjöfn Þórðar nýjustu mathöllina sem ber svo sannarlega nafn með rentu, Pósthúsið Foodhall , sem opnaði með pomp og prakt í nóvember síðastliðnum. Höllin er staðsett í sögufrægu húsi við Pósthússtræti 5 á einu frægasta horni miðborgarinnar og er einstaklega falleg þar sem glæsileikinn og hlýleikinn fara vel saman.
Pósthúsið Foodhall stendur á einu frægasta horni miðborgarinnar, Pósthússtræti 5 í þessu reislega og glæsilega húsi. MYND/SIGTRYGGUR ARI.
Mathöllin er hönnuð af Leifi Welding sem er einnig einn af eigendum en meðeigendur hans eru Hermann Svendsen, Ingvar Svendsen og Þórður Axel Þórisson en Þórður er jafnframt framkvæmdastjóri fyrirtækisins. Sjöfn hittir Leif sem sviptir hulunni af leyndardómum Pósthússins og býður Sjöfn í ævintýra- og matarupplifunnarferð í mathöllinni.
„Við vildum fá til liðs við okkur fremsta fagfólk í veitingageiranum til þess að skapa hágæða veitingastaði, og það hefur svo sannarlega gengið eftir. Við vorum það heppnir að það komust mun færri að en vildu þar sem þeir aðilar sem við kynntum konseptið fyrir höfðu tröllatrú á okkar hugmyndafræði,“ segir Leifur og bætir við að viðtökurnar hafi verið hreint út sagt frábærar og veitingastaðirnir blómstri og höllinni iði af mannlífi og einstakri matarflóru sem hafi slegið í gegn síðustu vikur.
Staðirnir í mathöllinni eru níu talsins, átta veitingastaðir og einn bar og bjóða upp á fjölbreytt úrval sælkera kræsinga og drykkja þar sem allir ættu að finna eitthvað við sitt hæfi. Meðal þeirra sem hafa opnað í stað í Pósthúsinu er hinn landsfrægi matreiðslumaður, Siggi Hall sem er annálaður fyrir sína ítölsku matargerð, Yesmini Olsson matgæðingur með meiru sem býður upp á matargerð fléttaða frá nokkrum löndum, Haukur hjá Yuzu sem allir þekkja vel, síðan er það Pizza Popolare sem býður upp á Napólí pizzur eins og þær gerast bestar, þunnir botnar, flöffí kantar og með sérinnflutt ítölsk hráefni.
Meira um nýjustu mathöllina, Pósthúsið, í þættinum Matur og heimili á Hringbraut í kvöld fyrst klukkan 19.00 og aftur klukkan 21.00.
Hægt er að sjá brot í þætti kvöldsins hér:
Matur og heimil stikla 27. desember 2022
