Hann vakti athygli fyrr á árinu í Hljómskálanum með kántrýrokk útgáfunni sinni af GusGus laginu „Stay the Ride” sem hann fylgdi svo eftir með laginu „I Got You” en það kom mörgum á óvart að heyra þennan magnaða gítarleikara og tónskáld stíga fram með sína einstöku söngrödd sem þarf greinilega að heyrast oftar.
Lagið „One Day” sem er í aðeins draumkenndari stíl en hin lögin sem á undan koma tileinkar Guðmundur öllum sem eru að fæðast, deyja, byrja, hætta, gefast upp eða endurlífgast. Aðspurður segist hann hafa samið lagið þegar hann þurfti að dvelja yfir jólin 2021 á sóttvarnarhótelinu á Rauðarárstíg.
„Það var ansi furðuleg lífsreynsla. En þegar manni eru settar svona stífar skorður gerist oft eitthvað nýtt og spennandi í listsköpun. Á sama tíma var ég að lesa um Dostojevskí og þegar átti að taka hann og nokkra aðra af lífi en eftir 5 mínútur var hætt við. Þessi reynsla hafði mikil áhrif á hann. Það má segja að sú frásögn hafi að einhverju leyti verið kveikjan að laginu. En það er svo undir hverjum og einum að túlka söngtextann fyrir sig,” segir hann.
Sjálfur sér Guðmundur um söng, hljóðfæraleik, upptökustjórn og hljóðblöndun, á trommur er Kristinn Snær Agnarsson, í bakröddum er Ragnheiður Gröndal og um masteringu sér Sigurdór Guðmundsson.
Síðasta vor var Guðmundur fenginn til að taka ábreiðu af GusGus laginu „Stay the Ride” En það var hluti af ákveðnu þema í þættinum.
„Svo vorum við sami hópurinn beðin um að vera með stutt atriði í kvikmyndinni Napóleónskjölin sem er skrifuð eftir samnefndri bók eftir Arnald Indriðason sem kemur út á næsta ári. Svo þá samdi ég I’ve Got You og gaf það út í leiðinni auk þess sem við tókum upp myndband af lifandi flutningi þess” segir Guðmundur.
„Það er alveg mögulegt að þetta lag og þau sem hafa komið út séu aðdragandi að plötu. Ég held að það sé það sem sé að gerast, þótt ég sé búinn að vera að taka eitt skref í einu í þessu. Þá sé ég alveg fyrir mér að það gerist á næsta ári” bætir hann jafnframt við.
Það er alltaf mikið í gangi hjá þessum fjölhæfa tónlistarmanni en þau Ragga Gröndal voru að skila af sér verki fyrir tónlistarhóp í Tékklandi, ásamt því að hann kom fram á tónleikum í Póllandi um daginn þar sem hann tók sín eigin lög í bland við blústónlist svo eru að sjálfsögðu árlegu jólatónleikar Baggalúts á næsta leyti.
Lagið „One Day” er nú aðgengilegt á öllum helstu streymisveitum og einnig er hægt að fylgjast með næstu verkefnum Guðmundar á facebook og instagram.
