Leikarinn Matthew Perry, sem er þekktastur fyrir hlutverk sitt sem Chandler Bing í sjónvarpsþáttunum Friends, greinir frá því að hann hafi slaufað sambandinu sínu við stórleikkonuna Juliu Roberts útaf eigin óöryggi. Hann var sannfærður um að hún myndi ekki geta hugsað sér samband við hann og ákvað því að verða fyrri til.

Þetta kemur fram í nýrri ævisögu Perry sem ber heitið Friends, Lovers And The Big Terrible Thing en þar fer leikarinn yfir feril sinn og því sem var á gangi bak við tjöldin á meðan þættirnir vinsælu voru í loftinu.

Í bókinni kemur fram að samband leikaranna hafi hafist þegar framleiðendur þáttanna vildu ólmir að Roberts færi með gestahlutverk árið 1995. Leikkonan heimsfræga var mikill aðdáandi þátttanna og þá sérstaklega karaktersins Chandler Bing. Lét hún í ljós að hlutverk í þáttunum kæmi aðeins til greina ef að persóna hennar ætti í einhverskonar sambandi við hinn taugaveiklaða en hnyttna Bing. Til þess að landa samningnum báðu framleiðendurnir Perry um að hafa samband við Roberts og sannfæra hana endanlega.

„Ég sendi henni þrjár tylftir af rauðum rósum og fallegt kort með skilaboðunum: „Það eina sem er meira spennandi en að þú takir að þér gestahlutverk í þáttunum er að ég hef loksins afsökun til að senda þér blóm“,“ segir sjarmörinn.

Roberts hafi samþykkt að taka að sér hlutverkið um leið og sendi Perry fullt af beyglum að gjöf.

Þá fór í hönd þriggja mánaða tímabil þar sem að parið daðraði í gegnum samskiptatækni sem dáið hefur hratt út, blessað faxið.

„Þrisvar til fjórum sinnum á dag þá sat ég fyrir framan faxtækið mitt og fylgdist með nýjustu skilaboðum hennar birtast á pappírnum. Ég var svo spenntur að sum kvöld var ég kannski í partýi að daðra við einhverja fallega konu en slaufaði því samtali í hvelli til þess að flýta mér heim og kanna hvort að nýtt fax hefði borist. Í níu af hverjum tíu tilvikum var það raunin,“ segir Perry.

Að lokum heimsótti Roberts Perry og þá hófst skammvinnt ástarsamband þeirra. „Það að vera í sambandi við Juliu Roberts reyndist mér um megn. Ég var alltaf viss um að hún myndi segja mér upp. Af hverju ætti hún ekki að gera það? Ég var ekki nóg, ég gæti aldrei verið nóg. Ég var brotinn, beygður og það var ekki hægt að elska mig,“ segir Perry í bókinni. Í stað þess að þurfa að þola hina óumflýjanlegu eymd að missa af ástinni sinni hafi hann ákveðið að vera fyrri til.

Í bókinni er minnst á fleiri ástarsambönd Perry við frægar leikkonur og fyrirsætur, meðal annars að hann og Gwyneth Paltrow hafi kelað í partýi einu á þessum árum.