Míuverðlaunin voru afhent í þriðja sinn í gær við hátíðlega athöfn á Spritz Venue, Reykjavík. Tíu heilbrigðisstarfsmenn sem vinna með langveikum börnum voru heiðraðir á viðburðinum.
„Míuverðlaunin eru verðlaun til að heiðra þá sem koma að þjónustu langveikra barna á einn eða annan hátt. Einhver sem hefur hjálpað eða stutt við þig og þína fjölskyldu á erfiðum tíma. Það sem þeim finnst vera „bara vinnan sín“ getur skipt sköpum fyrir aðstandendur langveikra barna og börnin sjálf. Hægt er að tilnefna heilbrigðisstarfsmann í hvaða starfsstétt sem er, hvar á landinu sem er,“ segir í tilkynningu um verðlaunin.
Epal eru aðalstyrktaraðilar verðlaunanna í ár og leyndi það sér ekki að viðburðurinn var einstaklega fallegur. Veitingarnar voru styrktar af Ölgerðinni, Hamborgarafabrikkunni, Töst og Gulla Bakara. Patricia Arjona, innanhússarkitekt, stíliseraði viðburðinn.
Tryggvi Helgason, barnalæknir á Barnaspítala Hringsins og Domus Medica, hlaut Míuverðlaunin að þessu sinni.
Brynja Dan, athafnakona, afhenti Míuverðlaunin ásamt Ingu Elínu einni virtustu handverkskonu Evrópu, sem hannaði verðlaunagripinn. Skúlptúrinn, prýðir fallega orðið “hugrekki” sem hefur verið einkennisorð Mia Magic og er tekið úr fyrstu bókinni, Mía fær lyfjabrunn.
