Sumarkjóla- og freyðivínshlaupið var haldið í annað sinn en fyrsta hlaupið fór fram í ágúst 2019. Konur sem eiga heiðurinn af því að Prosecco-hlaupið svokallað varð að raunveruleika eru þær Birna Jónsdóttir og Rakel Jóhannsdóttir. Í þættinum Matur og heimili hitti Sjöfn Þórðar þær stöllur og fékk að heyra söguna bak við hlaupið og kíkti á stemninguna á svæðinu en hlaupið fór fram í Elliðárdalnum.

„Áramótaheitið var lengi vel að halda Prosecco-hlaup og létum við verða að því fyrir þremur árum. Við fengum okkur prosecco eitt fallegt sumarkvöld og buðum á viðburðinn á Facebook, ætluðum svo að enda hlaupið í pottinum hjá Rakel,“ segir Birna og hlær.

Þátttakan fór fljót fram úr öllum væntingum. „Rakel hafði svo mikla trú á þessu að hún sagði að allavega 200 myndu mæta. Daginn eftir höfðu 200 manns meldað sig og ég var framan af viss um að Rakel hefði ekki hætt fyrr en 200 væru búnir að skrá sig.“

Aðspurðar segja þær stöllur að forsagan af þessu hlaupi sé fyrst og fremst sú að þeim fannst vanta stemningshlaup sem auðvelt væri að taka þátt í. „Okkur fannst vanta hlaup þar sem ekki þarf að undirbúa sig eða kosta miklu til. Hver á ekki ískalda freyðivínsflösku í ísskápnum, sumarkjól og er stemningskona eins og við? Enga púlsmæla og spandex heldur bara samvera í dalnum okkar.“

Sjöfn heimsækir líka glænýjan og metnaðarfullan hamborgarastað sem ber heitið Beef & Buns í Mathöll Höfða. Maðurinn bak við staðinn er Máni Snær Hafdísarson sálfræðingur og aðaleigandi staðarins en hann þróaði sinn drauma hamborgara á nokkrum árum á meðan hann var í námi í Kaupmannahöfn. Mána langaði til að leyfa fleirum að njóta afrakstursins en fjölskyldu sinni og fékk sér til liðs kokkinn Pétur Kristjánsson sem er líka fyrrum skólafélagi hans og opnaði Beef & Buns.

Beef & Buns borgarinn varð til eftir nokkurra ára tilraunastarfsemi í eldhúsinu hjá Mána en hann nýtur þess að dunda sér í eldhúsinu í frítímanum sínum og leyfir matarástríðunni að blómstra. Hamborgarinn hans Mána er einmitt gott dæmi um töfrana sem gerast í eldhúsinu.

„Ferlið var líkt og í vísindatilraun þar sem mismunandi nautasteikur voru vigtaðar, hakkaðar, og blandað saman í ótal mismunandi hlutföllum þar til fullkomið bragð og áferð náðist. Margar brauðuppskriftir voru bakaðar, hrært var í tugir tegundir sósa, allskyns cheddar ostar voru smakkaðir og gúrkur voru sýrðar á mismunandi máta,“ segir Máni og er ótrúlega ánægður með útkomuna.

Máni lét sér ekki nægja að finna uppskriftina bak við drauma hamborgarann og hamborgarabrauðið heldur hannaði hann staðinn líka. Staðurinn er bjartur og stílhreint í 90´s stíl og fangar augað.

Máni og Pétur bjóða Sjöfn upp á Beef & Buns hamborgarann sem sló rækilega í gegn. „Þvílíkt sælgæti, þessi brögð, áferð og þetta brauð,“ sagði Sjöfn eftir fyrsta bitann.

Meira um söguna bak við hamborgarann hans Mána, Beef & Buns og Blómakjóla- og freyðivíns-hlaupið í þættinum Matur og heimili í kvöld klukkan 19.00 og aftur klukkan 21.00 á Hringbraut.

Hér má sjá brot úr þætti kvöldsins: