Þrátt fyrir að verðbólgudraugurinn sé búinn að hrella heimsbyggðina að undanförnu þá bjóst enginn við því að sjá meðlim bresku konungsfjölskyldunnar í láglaunastarfi í sumar. Það reyndist þó vera raunin því lafði Louise Windsor, 18 ára barnabarn Elísabetar Bretlandsdrottningar, vann í garðyrkjubúð í sumar. Frá þessu greinir The Sun.

Lafði Louise tók við starfinu á meðan hún beið eftir prófniðurstöðunum sínum en ljóst er að þær voru nokkuð góðar þar sem hún er komin með pláss í enskunámi í St Andrews háskólanum. Einungis 8.35% þeirra sem sækja um inngöngu í skólann komast í hann og til þess að komast í enskunámið þurfa nemendur að vera með að minnsta kosti tvær A-einkunnir og eina B-einkunn.

Það kom fólki sem verslaði í garðyrkjubúðinni á óvart þegar það var afgreitt af konungsbornu stúlkunni. „Ég veit að greiðslubyrði heimilanna hefur aukist en ég hefði aldrei trúað því að ég myndi sjá barnabarn drottningarinnar að vinna í garðyrkjubúð,“ segir einn viðskiptavinur lafðinnar í samtali við The Sun.

Talið er að launin fyrir vinnuna sem lafði Louise var í séu í kringum 6,8 pund á tímann, það eru einungis um 1.130 í íslenskum krónum. Samkvæmt heimildum The Sun var lafði Louise að hjálpa til á kassanum í búðinni auk þess sem hún heilsaði viðskiptavinum og sá um plönturnar. „Ég trúði því ekki að þetta væri lafði Louise,“ segir annar viðskiptavinur sem afgreiddur var af konungsbornu stúlkunni.

„Hún er mjög hógvær og indæl ung kona sem er kurteis og umhyggjusöm þegar kemur að viðskiptavinunum. Hún virtist elska starfið. Ég hefði aldrei ímyndað mér að barnabarn drottningarinnar myndi taka starfi þar sem hún væri að vinna á kassa.“