Starfsmaður Burger King deildi myndbandi af sér opna gjöf frá fyrirtækinu sem hann fékk eftir 27 ár í starfi og hefur myndbandið farið eins og eldur í sinu um netheima,
Kevin Ford hefur unnið á Burger King í 27 ár og er með „fullkomna mætingu.“ Fyrir þjónustu sína við fyrirtækið í öll þessi ár fékk hann gjöf frá HMS Host, fyrirtækið sem ræður inn starfsmenn fyrir Burger King.
Hann fékk lítinn Reese‘s nammipoka, fjölnota Starbucks kaffibolla, tvo penna og einn bíómiða, TMZ greinir frá.
„Ég er ánægður með hvað sem er, þakklátur fyrir hvað sem ég fæ. Ég er ekki þannig týpa, trúðu mér, ég hef gengið í gegnum ýmislegt,“ sagði hann í samtali við TMZ.
„Þetta er frábært fyrirtæki, þú veist. Ég hef verið þarna í 27 ár. En eins og svo mörg stór fyrirtæki þá hafa þeir eiginlega misst tenginguna við starfsmennina, og í gegnum Covid og eitthvað, þá hættu þeir að gera ýmislegt,“ sagði hann.
„Í 20 ár fengum við ávísanir/gjafakort og það er það sem ég hélt í fyrtu að bíómiðinn væri. Ég var alveg: „Hey ég fékk loksins kortið mitt“ en svo sá ég að þetta var bíómiði og ekki einu sinni tveir miðar […] Það var eins og þeir gáfu mér bara dót sem þeir áttu nú þegar og settu saman í einn poka.“
Dóttir hans stofnaði GoFundMe síðu fyrir hann svo hann gæti komið og heimsótt barnabörnin sín í Texas, en hann býr í Las Vegas.
Leikarinn David Spade sá myndband Kevin og gaf honum fimm þúsund dollara, um 660 þúsund krónur, og sendi Burger King starfsmanninum falleg skilaboð.
Kevin getur núna tekið sér loksins frí í vinnunni og heimsótt fjölskyldu sína en á meðan greinin er skrifuð hafa tæplega 40 þúsund dollarar – um 5,3 milljónir króna – safnast á GoFundMe síðu hans.