Stöð 2 tilkynnir að Idol mun hefja göngu sína á ný í haust. Komin er upp skráningarsíða og undirbúningur að nýrri þáttaröð af þessum frægu þáttum er hafinn. Einnig mun svokölluð Idol lest fara hringinn um landið í leit að hæfileikafólki.
Idol þættirnir hafa verið sýndir víða um heim síðustu tuttugu ár við gríðarlegar vinsældir og margar af skærustu stjörnum tónlistarheimsins hafa stigið sín fyrstu skref þar. Fjórar íslenskar þáttaraðir voru sýndar á Stöð 2 á árunum 2003 til 2009.
Hlökkum til að sjá ungt hæfileika fólk á Idol sviðinu
„Stöð 2 tilkynnir með stolti að leitin að næstu Idol stjörnu Íslands er hafin.
Þættirnir verða á dagskrá í haust en leitin hefst núna á https://idol.stod2.is/
Við hvetjum alla áhugasama á aldrinum 16 til 30 ára að senda inn myndband með söngprufu. Idol lestin mun einnig verða á ferðinni í leit að hæfileikafólki um landið í sumar. Nánari dagsetningar verða auglýstar síðar.
Dómnefndin verður skipuð nokkrum af skærustu stjörnum íslenskrar tónlistar í dag og við kynnum þau til leiks á næstu dögum. Tónlistarstjórn þáttanna verður í höndum Magnúsar Jóhanns Ragnarssonar sem stýrir einnig hljómsveit þáttanna,“ segir Stöð 2 í tilkynningunni.
„Við fundum fyrir miklum áhuga meðal áskrifenda okkar að vera með hæfileikaþátt og Idolið var oftast nefnt. Við vitum að það er fjöldinn allur af ungu fólki sem að vill nýta sér þennan vettvang til að koma sér á framfæri. Við erum gríðarlega spennt að vinna með öllu því fagfólki sem kemur að þáttunum og hlökkum mikið til að sjá ungt hæfileikafólk á Idol sviðinu í haust“ segir Þórhallur Gunnarsson, framkvæmdastjóri fjölmiðla Stöðvar 2 og Vodafone.
