Segja má með sanni að það sé bæði hlýlegt og bjart í eign dagsins í dag, en um er að ræða íbúð á Hlíðarvegi í Kópavogi í húsi sem á sér langa sögu og líklega stað í hjarta margra sem ólust upp í nágrenninu.
Þar var í fjölda ára, á hæðinni fyrir neðan, rekinn verslunin Hvammsval. Líklega ófáir sem lögðu leið sína þangað til að kaupa mjólkurfernu fyrir foreldrana með brakandi 100 krónu seðli og ef heppnin var með manni var hægt að velja sér bland í poka fyrir afganginn. Þetta var fyrir tíma opnu nammibaranna í verslununum svo sælgætinu var stillt upp fyrir aftan glerskilrúm, í litlum kössum og sá afgreiðslumanneskjan um að koma þeim í litla græna nammipoka.
Fyrir þá sem muna enn lengra aftur var þarna fyrir ennþá lengra síðan að finna útibú frá kjörbúðinni KRON sem opnaði á sjötta áratug síðustu aldar.
Nú hefur húsið fengið yfirhalningu og er jarðhæðin nú skipulögð sem íbúðarhúsnæði en ekki atvinnuhúsnæði.
En aftur að eign dagsins. Íbúðin er skráð 130,4 fermetrar og þar af er bílskúr sem er 34,7 fermetrar. Þar má finna þrjú svefnherbergi, opið rými með stofu, borstofu og eldhúsi og svo er þvottahús á hæðinni sem er sameiginlegt með einni annari íbúð. Eins eru stórar sameiginlegar svalir á hæðinni. Ásett verð er 78,8 milljónir.
Nánar má lesa um eignina á Fasteignavef DV
