Anna Kristjánsdóttir, vélstjóri á eftirlaunum sem ákvað að flytjast búferlum til Kanaríeyja, nánar tilgreint til Tenerife, fyrir nokkrum árum síðan, leiðréttir algengan misskilning sem Íslendingar eru gjarnan haldnir um eyjarnar fögru.

„Iðulega heyri ég meðal Íslendinga að Gran Canaria sé stærst Kanaríeyja. Þegar ég reyni að leiðrétta þetta meðal annars með því að tala um litlu eyjuna með stóra nafnið, lítur fólk gjarnan á það sem öfund í garð Gran Canaria og fyllist efasemdum um sannleiksást mína,“ skrifar Anna á Facebook.

Hún bætir við, máli sínu til stuðnings, opinberum stærðum Kanaríeyjanna, en þær eru eftirfarandi:

1. Tenerife – 2034 ferkílómetrar
2. Fuerte Ventura – 1660 ferkílómetrar
3. Gran Canaria – 1560 ferkílómetrar
4. Lanzarote – 845,9 ferkílómetrar
5. La Palma – 708,3 ferkílómetrar
6. La Gomera – 370,0 ferkílómetrar
7. El Hierro – 268,7 ferkílómetrar
8. La Graciosa 29,05 ferkílómetrar

Anna ákvað til samanburðar að nefna nokkrar aðrar staðreyndir svo betur sé hægt að átta sig á stærðum Kanaríeyjanna.

„Til samanburðar er Heimaey 13,4 ferkílómetrar, en þar að auki er fjallið El Teide á Tenerife, hæsta fjall Spánar, 3718 metrar á hæð og malbikaðir vegur ná upp í yfir 2200 metra hæð, en Hvannadalshnúkur er 2110 metrar á hæð. Ég sé Vegagerðina í anda reyna að malbika veg upp á Hvannadalshnúk. Heildarstærð Kanaríeyja er 7475,95 ferkílómetrar en Vatnajökull er um 7900 ferkílómetrar.“

Anna bætir þó við að Kanaríeyjar séu þú töluvert hlýrri en Vatnajökull.

„En samt. Það er miklu hlýrra hér en á Vatnajökli þótt hér sé stundum alltof kalt.“ 

Anna tekur fram að nú sé loksins farið að hlýna á Kanarí eftir nokkra mánaða kuldakast. En hitinn á páskadag hafi farið upp í 34 gráður.