Lagið „Driver‘s License“ sló hlustunarmet streymisveita í fyrra og var vinsælasta lag ársins. Unga söng- og leikkonan Olivia Rodrigo samdi og söng smellinn, en hún var aðeins sautján ára þegar lagið kom út. Hún hefur aldrei staðfest um hvern lagið fjallar en er hefur verið talið fjalla um fyrrverandi kærasta hennar, Joshua Bassett.
Olivia og Joshua léku saman í Disney þáttunum „High School Musical: The Musical – The Series“. Þau opinberuðu aldrei samband sitt en voru aðdáendur ekki lengi að leggja saman tvo og tvo þegar hún gaf út lagið. Meintur ástarþríhyrningur milli Oliviu, Joshua og meðleikkonu þeirra og söngkonunnar Sabrinu Carpenter var á milli tannanna á fólki og fékk Joshua yfir sig holskeflu neikvæðra og ljótra skilaboða.
Viku eftir að Olivia gaf út lagið gaf Joshua út lagið „Lie Lie Lie“, Sabrina Carpenter gaf út lagið „Skin“ rúmlega viku eftir það, bæði lögin talin vera svar þeirra við lagi Oliviu.
Allt áreitið og neikvæða athyglin varð til þess að Joshua endaði á spítala í níu daga. Hann opnar sig um þetta í viðtali við People.
Hann gefur í skyn að það hefði verið allt stressið í kringum útgáfu „Driver‘s Licence“ og viðbrögð almennings við laginu sem hefði orðið til þess að heilsu hans hrakaði verulega.
Joshua segir að honum hafi byrjað að líða illa viku áður en hann var lagður inn á spítala vegna umræðnanna um hann á netinu í kjölfar útgáfu lagsins.
„Ég svaf í 16 til 20 tíma á dag,“ segir hann og bætir við að honum hefði liðið verr með hverjum deginum. „Ég gat ekki staðið uppréttur í meira en 30 sekúndur.“
Tæplega viku eftir að „Driver‘s License“ kom út gaf hann út lagið „Lie Lie Lie“ og ástand hans versnaði verulega.
„Mér fannst eins og hjartað mitt væri bókstaflega að bregðast mér. Ég man eftir að hafa hugsað: „Þetta er ekki bara kvíði. Þetta er slæmt.“ Læknar sögðu: „Ef þú hefðir ekki komið til okkar innan við tólf klukkutíma þá hefðir þú getað dáið heima hjá þér.“ „Það er sturlað að hugsa til þess að ég hefði verið mjög nálægt því að leggja mig á þessum tímapunkti,“ segir hann.
Söngvarinn var í níu daga á spítala en vandamálin héldu áfram. „Ég var mjög þunglyndur og stressaður. Ég fékk kvíðakast á hverjum einasta degi.“
Honum líður betur í dag. „Í fyrra urðu margar af mínum stærstu martröðum að veruleika, en það sýndi mér að ég verð alltaf í lagi, stundum bara betri.“
