Blóðdropinn 2022, verðlaun Hins íslenska glæpafélags fyrir bestu íslensku glæpasögu ársins 2021 verður afhentur í Grófarsafni Borgarbókasafnsins við Tryggvagötu í dag, miðvikudaginn 23. mars kl. 17.00. Léttar veitingar og allir unnendur íslenskra glæpasagna hjartanlega velkomnir og hvattir til koma og samfagna aðalkrimmanum í ár, sýna sig og sjá aðra.
Hér að neðan er listi yfir þær fimm glæpasögur sem tilnefndar eru til verðlaunanna, í stafrófsröð titla, ásamt stuttri umsögn dómnefndar Glæpafélagsins og kápukynningu viðkomandi krimma.
Farangur, eftir Ragnheiði Gestsdóttur.
Umsögn dómnefndar HÍG:
Farangur eftir Ragnheiði Gestsdóttur. Farangur er önnur glæpasaga Ragnheiðar en hún hefur skrifað mikið fyrir börn og unglinga. Aðalsögupersónan, Ylfa, leggur á flótta frá ofbeldisfullum sambýlismanni sínum en lendir í vægast sagt í óvæntum atburðum á lestarstöðinni í upphafi flóttans. Atburðarásin er hröð og andrúmsloftið þrungið spennu. Við fylgjumst með Ylfu reyna að leysa hvert vandamálið á fætur öðru, hundelt og dauðhrædd.
Kápukynning:
„Ylfa stendur á brautarpallinum, loksins búin að gera upp hug sinn. Hún verður að komast burt. Undir eins, áður en hann vaknar. Lestin, sem er væntanleg á hverri stundu, mun bera hana fyrsta áfangann á leiðinni heim. Heim í öryggið á Íslandi. Ekkert má koma í veg fyrir að hún komist af stað. Ekki einu sinni þessi óvænti farangur sem hún fær í fangið.“
Úgefandi: Bókabeitan
Horfnar, eftir Stefán Mána
Umsögn dómnefndar HÍG:
Í bókinni Horfnar eftir Stefán Mána heldur sagan um rauðhærða risann Hörð Grímsson áfram. Eftir erfiða reynslu við lögreglustörf gerist Hörður varðstjóri í litlu þorpi þar sem ekkert gerist. Það á þó eftir að breytast og hvarf tveggja stelpna á bakpokaferðalagi leiðir Hörð í gegnum spennandi atburðarás þar sem hann kynnist litríkum persónum sem hafa ýmislegt misjafnt í pokahorninu. Frásögnin er kraftmikil og auðvelt er að gleyma sér við lesturinn.
Kápukynning:
„Það er sumarbjart og sólin skín við Kirkjubæjarklaustur. Tvær þýskar vinkonur á bakpokaferðalagi heillast af stórbrotinni náttúrunni. Undir friðsælu yfirborðinu við Klaustur leynast þó myrk leyndarmál sem stúlkurnar tvær vilja ekki vita af.
Hörður Grímsson lögreglumaður er mættur að Klaustri til afleysinga. Þar gerist aldrei neitt. Að hann heldur.“
Útgefandi: Sögur
Umsögn dómnefndar HÍG:
Lok lok og læs eftir Yrsu Sigurðardóttur. Stór og mikil bók frá Yrsu í ár, 350 blaðsíður sem innihalda mikla spennu og hrylling. Í upphafi lýsir hún mjög dularfullum og hrottalegum glæp sem framinn er í íslenskri sveit og þú leggur bókina ekki svo auðveldlega frá þér eftir það. Í sögunni fylgjumst við með lögreglumanninum Tý og félögum hans við rannsókn glæpsins og samhliða fáum við að fylgjast með aðdraganda harmleiksins.
Kápukynning:
„Á köldu vetrarsíðdegi fer nágranni að huga að fjölskyldu í Hvalfjarðarsveit sem ekki hefur svarað skilaboðum. Fólkið veit ekki aura sinna tal og hefur komið sér fyrir í afdal utan alfaraleiðar. Nágranninn sér ummerki um mannaferðir en enginn svarar þegar hann drepur á dyr. Eftir að hafa litið inn í húsið hrökklast hann aftur út og kallar til lögreglu. Hvað gerðist hjá þessum nýju ábúendum?
Jafnframt því að fylgjast með rannsókn málsins fær lesandinn að skyggnast inn í líf fjölskyldunnar í aðdraganda þessara voveiflegu atburða þar sem ekki er allt sem sýnist.“
Útgefandi: Bjartur
Umsögn dómnefndar HÍG:
Dyggir lesendur Lilju Sigurðardóttur kannast vel við persónur Náhvítrar jarðar, sem halda áfram að stækka, verða áhugaverðari með hverri bók og njóta samúðar lesenda. Glæpunum sem tekist er á við er fagmannlega fléttað inn í persónuleg átök sögupersóna. Sögusviðið er að langmestu leyti Ísland en við ferðumst þó út fyrir landsteinana og tekist er á við stóra og skelfilega glæpi í feykilega spennandi frásögn.
Kápukynning:
„Náhvít jörð er hrollvekjandi saga um glæpamenn sem svífast einskis og fórnarlömb mansals – þræla nútímans. Áður eru komnar út tvær vinsælar bækur um sömu persónur, Helköld sól og Blóðrauður sjór.
Á hvítum vetrarmorgni finnst yfirgefinn flutningagámur í Rauðhólum við Reykjavík. Þegar hann er opnaður blasir hryllingurinn við: fimm lífvana konur sem augljóslega hafa verið fluttar í þessum gámi yfir hafið. Hvernig getur svona lagað gerst og hverjir standa að baki þessari óhæfu?
Rannsóknarlögreglumennirnir Daníel og Helena mæta á vettvang og hefjast handa en á meðan sinnir Áróra, vinkona Daníels, öðru máli: Elín frænka hennar er í sambandi við rússneskan mann sem vill endilega að þau gifti sig en virðist hafa óhreint mjöl í pokahorninu …“
Útgefandi: JPV
Umsögn dómnefndar HÍG:
Skáldsagan Út að drepa túrista er frumraun Þórarins Leifssonar á sviði glæpasagna. Höfundur leikur sér engu að síður af mikilli leikni að hinu hefðbundna glæpasagnaformi svo úr verður frumleg saga sem byggir á þekktum hefðum og minnum innan formsins. Sagan er spennandi en um leið bráðfyndin og heldur lesandanum vel við efnið.
Kápukynning:
„Út að drepa túrista er egghvöss og ísmeygilega fyndin glæpasaga mitt úr brjálæði massatúrismans. Hér gefst fágætt tækifæri til að gægjast bak við tjöldin í furðulegustu atvinnugrein landsins korteri áður en kórónaveiran lamar alla heimsbyggðina. Saga sem kemur sífellt á óvart.
Leiðsögumaðurinn Kalman er þreyttur. Hring eftir hring og ár eftir ár hefur hann mátt sinna kenjum fólks frá öllum heimshornum, svara furðulegum spurningum og bregðast við óvæntum uppákomum. En þessi síðasta Suðurstrandarferð ætlar allt að trompa. Ekki nóg með að einn farþeginn finnist myrtur í upphafi ferðar og morðinginn leynist um borð í rútunni heldur sveimar hættuleg veira um, veðurspáin er viðbjóður og sá sem lögreglan sendir til að leysa málið er í hæsta máta vafasamur.
Þórarinn Leifsson er með meirapróf í að eiga við ferðamenn. Áður hefur hann skrifað bækur bæði fyrir börn og fullorðna sem hafa verið þýddar á fjölda tungumála, hlotið verðlaun og fengið frábæra dóma. Þetta er fyrsta glæpasaga hans.“
Útgefandi: Mál og menning
Dómnefnd Hins íslenska glæpafélags var að þessu sinni skipuð þeim Helgu Birgisdóttur formanni, Áslaugu Óttarsdóttur og Snæbirni Pálssyni.
