Ólafur F. Magnússon, fyrrverandi borgarstjóri og læknir, skáld og lagahöfundur, hefur sent frá sér lagið „Er ég þig hitti“.

Myndband var gert við lagið í byrjun mars og má horfa á það í spilaranum undir fréttinni. Ólafur segir þetta um tilurð lags og myndbands:

„Í suðaustan strekkingnum í gærmorgun (laugardaginn 5. mars) tók Friðrik Grétarsson upp myndband við Gróttu, þar sem við Guðlaug Dröfn Ólafsdóttir erum í forgrunni sem söngvarar í lagi mínu og ljóði frá 16. janúar 2021: „Er ég þig hitti“. Meira en hálft ár er liðið frá því að ég gaf út lag síðast, en það var lag mitt og ljóð „Ættjarðarást“., með’ myndefni frá eldgosinu í Geldingadölum, sem þá stóð enn yfir. Kórónuveriufaraldurinn hefur hamlað frekari vinnslu á tónlist minni með myndböndum frá þeim tíma, enda koma þau Vilhjálmur Guðjónsson og Guðlaug Dröfn Ólafsdóttir (dóttir Labba í Mánum) iðulega að flutningi laga minna og Friðrik Grétarsson gerir myndböndin við lögin. Til liðs við okkur Guðlaugu í söngnum að þessu sinni kemur Halla Koppel, dóttir Vilhjálms Guðjónssonar, en hún sér um raddir í nýja laginu. “

Ljóðið er eftirfarandi:

„Er ég þig hitti, ástin mín,

yndisleg verður nærvera þín.

Við skulum njótast uns dagur dvín

og dásemd eignast er sólin skín.

Yndislegt verður ætíð með þér

og ávallt sértu ei langt frá mér.

Já, öll sú fegurð sem augað sér

hjá okkur dvelur og hvergi fer.

Já, sæl við erum saman alla leið,

sigurbraut kærust okkur verður greið.

Um stoðir landsins stöndum við æ vörð

og styrkja munum Ísafoldar svörð.“