Hljómsveitin Midnight Librarian hefur gefið út myndband við lag sem ber heitið Mindless. Hljómsveitin er skipuð sjö strákum sem allir eiga ættir sínar að rekja til Suðurnesja en hljómsveitin gaf út fyrstu plötu sína, From Birth til Breakfast, í ágúst í fyrra. Fyrsta smáskífa plötunnar, Funky Fresh, hefur hlotið góðar viðtökur en lagið hefur meðal annars verið í talsverði spilun á Rás 2. Mindless er því smáskífa númer tvö í röðinni.
Sveitin var nýlega í viðtali hjá Víkurfréttum þar sem fram kom að sveitin, þá skipuð þremur meðlimum, hafi byrjað í bílskúr fyrir rúmum þremur árum en verkefnið hafi þróast. Núna eru meðlimirnir sjö talsins, eins og áður segir, og sveitin ætlar sér stóra hluti á komandi misserum.
Bandið skipa þeir Þorsteinn Helgi Kristjánsson (sér um sönginn og er úr Garðinum), Haukur Arnórsson (leikur á hljómborð og er úr Grindavík), Atli Reynir Baldursson (gítarleikari úr Garði), Arnar Ingólfsson (leikur á gítar og Talkbox, úr Njarðvík), Atli Marcher Pálsson (bassi, Njarðvík), Jón Böðvarsson (saxófónleikari úr Njarðvík) og Valur Ingólfsson (trommur, Njarðvík).
Erfitt er að lýsa stíl hljómsveitarinnar en í áðurnefndu viðtali segja hljómsveitarmeðlimir að um sé að ræða „einhverskonar R&B, ballöður með fönki og einhverju diskó … rokk líka – þetta er einhvern veginn út um allt.“
