Fjölskyldusöngleikurinn Langelstur að eilífu var frumsýndur í Gaflaraleikhúsinu um helgina. Um tvöfalda frumsýningu var að ræða og gleðin í hámarki, bæði hjá áhorfendum og aðstandendum sýningarinnar. Verkið byggir á vinsælum verðlaunabókum Bergrúnar Írisar Sævarsdóttur sem tók einnig þátt í að skapa leikmynd verksins og teiknaði fjölda teikninga sem birtast á sviðinu. Leikgerð og leikstjórn er í höndum Bjarkar Jakobsdóttur sem tekist hefur að skapa töfrandi og einlæga sýningu sem kitlar hláturtaugarnar. Þá eru í sýningunni sex frumsamin lög eftir Mána Svavarsson og dilluðu frumsýningargestir sér í sætunum frá upphafi til enda sýningarinnar. Fjöldi barna leikur í verkinu og eru aðalleikkonurnar tvær ekki nema sjö ára gamlar. Nína Sólrún Tamimi lék á laugardaginn og Iðunn Eldey Stefánsdóttir steig á svið daginn eftir. Stelpurnar eru í skýjunum eftir frábæra sýningarhelgi þar sem þær fengu loks að uppskera eftir fjögurra mánaða þrotlausa vinnu.

„Það var gaman að sýna fyrir framan fullt af fólki sem ég þekki ekki neitt,“ segir Nína Sólrún glöð í bragði. „Mér finnst svo gaman að sýna. Svo kemur besta vinkona mín á næstu sýningu.“ Krakkarnir hafa æft daglega síðustu vikur en sýna nú hverja helgi og snúa aftur til hversdagslífsins á virkum dögum. „Það er skrítið og skemmtilegt að mæta aftur í skólann. Þótt það sé gaman að hitta skólafélagana þá sakna ég þess að hitta ekki vini mína í leikritinu eins oft og áður,“ segir Nína Sólrún einlæg.

Iðunn Eldey segir frumsýninguna hafa gengið mjög vel og er spennt fyrir komandi sýningarhelgum. „Við krakkarnir fórum í keilu eftir sýningu, fengum köku og tókum margar myndir. Það er samt mjög gaman að mæta aftur í skólann því það eru svo skemmtilegir dagar í þessari viku,“ segir Iðunn og vísar þar til bollu-, sprengi- og öskudagsins.

Mótleikari þeirra Nínu og Iðunnar er enginn annar en sjálfur Siggi Sigurjóns, einn ástsælasti leikari þjóðarinnar. Þá leika einnig í verkinu þau Júlíana Sara Gunnarsdóttir og Ásgrímur Geir Logason ásamt tíu börnum til viðbótar. Hefur hópurinn myndað með sér mikinn og sterkan vinskap enda ferlið orðið töluvert lengra en áætlað var, vegna covid-tafa. Næstu sýningar eru uppseldar en hægt er að nálgast miða á tix.is.

1. Nína Sólrún Tamimi hlakkar til að fá bestu vinkonu sínu á næstu sýningu.
   
2. Iðunn Eldey Stefánsdóttir var stolt eftir vel heppnaða frumsýningu.
   
3. Björk Jakobsdóttir, leikstjóri verksins ásamt Lárusi Vilhjálmssyni, framkvæmdarstjóra Gaflaraleikhússins og Bergrúnu Írisi Sævarsdóttur, höfundi verksins.
   
4. Langelstur-bækurnar hafa slegið í gegn og eru nú komnar á svið í stórskemmtilegum fjölskyldusöngleik.
   
5. Þau Magnús Geir, Salka, Íris Dögg og Björn stilltu sér upp fyrir ljósmyndara.
   
6. Björk Jakobs ásamt danshöfundinum Chantelle Carey.
   
7. Kolbrún leikur í sýningunni og mætti fjölskylda hennar til að styðja hana úr salnum.
   
8. Eyja og Rögnvaldur í leir- og leiklistarformi.
   
9. Óli Gunnar og Hrannar Þór voru í stuði.
   
10. Rebecca, Hildur og Helga voru ánægðar með frammistöðu sína í sýningunni.
    
11. Árni Gunnar og Nína Sólrún fögnuðu saman.
    
12. Foreldrar litlu leikaranna héldu ræðu og þökkuðu aðstandendum sýningarinnar fyrir að halda vel utan um börnin á æfingartímanum.
    
13. Gleðin skein úr hverju andliti.
    
14. Tveir barnahópar skiptast á að leika í verkinu.
    
15. Siggi Sigurjóns, Bergrún Íris og Björk Jakobs hafa öll verið útnefnd bæjarlistamenn Hafnarfjarðar og leiða hér saman hesta sína í glæsilegri sýningu.
    
16. Eftir sýningu tóku við ræðuhöld og myndatökur.
    
17. Júlíana Sara leikur mömmu Eyju og kennarann og smellti af baksviðs.