Fyrrum klámstjarnan Channon Rose deildi á dögunum myndbandi á samfélagsmiðlinum TikTok þar sem hún segist ekki lengur nota hefðbundinn klósettpappír.

„Ég kaupi ekki lengur klósettpappír, við notum endurnýtanlegan klósettpappír,“ útskýrir hún í myndbandi sem hún birti á miðlinum. „Sumu fólki gæti fundist það ógeðslegt en við erum með skolskál [e. bidet] og notum endurnýtanlega klósettpappírinn eiginlega bara til þess að þurrka okkur.“

Rose, sem er í dag nokkuð vinsæll áhrifavaldur á TikTok og fleiri miðlum, segist vera að reyna að minnka rusl á heimilinu með því að nota ekki hefðbundinn klósettpappír. Hún notar heldur ekki einnota tíðarvörur þegar hún er á blæðingum. Auk þess er hún og fjölskyldan hennar hætt að nota tannkrem í túpu en þau notast þess í stað við tannkrem í töfluformi.

Margir fylgjendur Rose lýstu yfir aðdáun sinni á því hversu umhverfisvæn hún er, þó voru ekki allir alveg á sama stað þegar kemur að endurnýtanlega klósettpappírnum. „Ég myndi fá áfall ef ég væri gestur heima hjá þér og myndi ekki sjá neinn klósettpappír,“ segir til að mynda einn netverji í athugasemd við myndbandið.

Þá voru aðrir netverjar sem veltu fyrir sér hreinleika þess að notast ekki við klósettpappír. Rose benti þá á að í raun er þetta hreinlegra en að nota klósettpappír þar sem verið er að skola en ekki bara þurrka.

Hún segir svo að hún sjái alltaf til þess að það sé til venjulegur klósettpappír á heimilinu fyrir gesti svo fólki sem er boðið í heimsókn til hennar þurfi ekki að hafa óþarfa áhyggjur.