Kóresku sjónvarpsþættirnir Squid Game eru að fara sigurför um heiminn. Þættirnir eru þeir vinsælustu á efnisveitunni Netflix um þessar mundir og hafa verið hlaðnir lofi.

Þættirnir eru afar hrollvekjandi en í stuttu máli fjalla þeir um fólk í peningaerfiðleikum sem ákveður að taka þátt í keppni þar sem himinhá peningaupphæð eru í boði. Í keppninni keppa einstaklingar í ýmsum barnalegum leikjum þar sem aðeins einn getur staðið uppi sem sigurvegarar. Aðrir keppendur eru samviskusamlega aflífaðir.

Vinsældir þáttanna hafa þó komið í bakið á saklausri konu. Í fyrsta þætti kemur símanúmer fyrir á nafnspjaldi en í það eiga áhugasamir einstaklingar um þátttöku í Squid Game að hringja. Illu heilli um raunverulegt símanúmer áðurnefndrar konu að ræða og í kjölfarið að þættirnir slógu í gegn bræddi sími hennar næstum úr sér. Daily Star greinir frá.

„Það er hringt allan sólarhringinn, þetta hefur sett daglegt líf mitt algjörlega úr skorðum,“ segir konan í nafnlausu viðtali. Að hennar sögn hefur hún verið með sama símanúmer í áratug og því skapar það henni talsverð óþægindi að þurfa að skipta því út.

„Það koma inn meira en 4.000 símtöl á dag. Ég vissi ekkert hvað var í gangi þar sem ég hef ekki fylgst með þessum sjónvarpsþáttum,“ segir konan.

Forsvarsmenn Netflix hafa viðurkennt að þeir séu meðvitaðir um vandamálið sem upp kom og vinni að lausn þess með framleiðslufyrirtæki þáttanna, Cyron Pictures.

Samkvæmt kóresku síðunni Koreaboo hefur Netflix þegar leyst málið með að borga konunni skaðabætur fyrir óþægindin.