Reykjavíkurdætur, eða Daughters of Reykjavik eins og þær kallast í dag, gáfu nýverið út lagið Hot Milf Summer. Í laginu rappa þær Salka Valsdóttir, Þuríður Blær Jóhannsdóttir, Jóhanna Rakel Jónasdóttir, Þórdís Björk Þorfinnsdóttir, Steinunn Jónsdóttir og Þura Stína Kristleifsdóttir um umrætt Hot Milf Summer. Milf er þekkt skammstöfun fyrir „Mother I’d like to fuck“, sem hægt væri að íslenska sem „móðir sem mig langar að ríða“. Þá vísar heiti lagsins í slagorð rapparans vinsæla Megan Thee Stallion, „hot girl summer“.
Myndband við lagið var birt á YouTube í dag en athygli vekur að notendur þurfa að skrá sig inn til að horfa á myndbandið. Ástæðan fyrir því er sú að myndbandið er bannað börnum á YouTube vegna nektar í því. Nektin er þó afar smávægileg, sjá má Reykjavíkurdæturnar á brjóstunum og að pumpa brjóstamjólk í brúsa.
Ljóst er að YouTube fetar í sömu fótspor og margir aðrir samfélagsmiðlar þegar kemur að viðkvæmni fyrir brjóstum á konum. Ekki er hægt að segja sömu söguna um efri búk karlmanna en YouTube bannar ekki myndbönd sem innihalda karlmenn sem berir eru að ofan.
Hér fyrir neðan má horfa á myndbandið við lagið Hot Milf Summer:
