Þann 7. júní síðastliðinn minntist lögmaðurinn Sveinn Andri Sveinsson þess að bróðir hans, Lúðvíg Árni Sveinsson heitinn, hefði fagnað sextugsafmæli þann dag. Lúðvíg varð bráðkvaddur þann 27. desember árið 1999.

Í myndskreyttri Facebook-færslu, sem Sveinn hefur veitt DV góðfúslega leyfi til að birta úr, segir Sveinn að Lúðvíg hafi verið einn af þeim fáu mönnum sem alltaf var hægt að reiða sig á. Hann segir söknuðinn mikinn en minningin um ljúfan og kláran dreng vegi hann upp:

„Minn allra besti vinur og bróðir, Lúðvíg Árni Sveinsson, hefði fagnað sextugs afmæli í dag, hefði hann ekki orðið bráðkvaddur þann 27. desember 1999.

Lúlli var einn af þessum traustu mönnum sem alfarið er hægt að reiða sig á, enda voru þeir fjölmargir sem það gerðu og sumir lögðu allt sitt traust á hann. Gilti þar einu hvort í hlut áttu börnin, vinirnir, viðskiptafélagar, félagar hans í Val eða litli bróðir.

Það leið ekki sá dagur að við værum ekki í sambandi, þar sem við leituðum ráða hjá hvor öðrum eða spjölluðum um lífið og tilveruna. Lúlli var mér stoð og stytta í daglegu lífi og órjúfanlegur hluti þess.

Söknuðurinn er ávallt mikill en ljúfari er samt minningin um kláran og ljúfan dreng, með glettinn húmor; hvers manns hugljúfi og kvennaljómi, sem engan óvin átti en sæg góðra vina, en umfram allt, bezta bróður sem hægt að vinna í lífsins genalottói.“