Bankastræti Club opnar á föstudaginn næstkomandi með tilheyrandi látum en skemmtistaðurinn er staðsettur við Bankastræti 5 þar sem B5 lifði góðu lífi fyrir heimsfaraldur. Vegna rekstrarerfiðleika á meðan samkomutakmarkanir voru í gildi þurfti að loka B5 og hoppaði athafnakonan Birgitta Líf Björnsdóttir í skarðið og opnar þar nýjan skemmtistað.
Margir bíða spenntir eftir opnuninni enda var B5 einn vinsælasti skemmtistaður miðbæjar Reykjavíkur. Instagram-reikningur staðarins er nú þegar kominn með tæplega 3.000 fylgjendur og er Birgitta Líf dugleg að uppfæra fylgjendur um hvað er á bakvið tjöldin.
Á dögunum tilkynnti hún að hægt væri að bóka flöskuborð á netinu en þar greiðir maður 10.000 krónur sem staðfestingargjald. Einnig birti hún verðlista á flöskuborðum staðarins en þau kosta allt frá 50.000 upp í 750.000 krónur. Þó er hægt að fá ákveðnar flöskur á 10.000 krónur fyrir klukkan 22.
Birgitta var í viðtali hjá mbl.is í morgun þar sem hún sagði meira frá staðnum. Þar kom meðal annars fram að aldurstakmarkið verði 22 ára en venjan er að skemmtistaðir hleypi fólki yfir tvítugu inn. Þá vildi hún gera staðinn eins og skemmtistaðir eru í Los Angeles og Miami og því opnar staðurinn fyrr og lokar fyrr. Birgitta segir að hann opni klukkan 19:00 og hurðin loki 00:30 en samkvæmt Instagram-síðu staðarins verður hann opinn lengur fyrir þá sem mættir eru.
Eftir klukkan 22 kostar 2.000 krónur inn en einnig er hægt að kaupa aðild að klúbbnum. Venjuleg áskrift kostar 5.990 krónur á mánuði og innifalið í því er ótakmarkaður aðgangur að staðnum og klippikort fyrir fimm skot á barnum. Elite-áskriftinni fylgja aðeins fleiri fríðindi, til dæmis VIP-röð, gestur, 15% afsláttur og fleiri tilboð. Sú áskrift kostar 19.900 krónur á mánuði.
Aðildarkortin eru ekki komin í sölu en Birgitta birti skjáskot á dögunum þar sem hún sýndi að kortin koma rafrænt í síma fólks, líkt og ökuskírteini og önnur kort.
Góða kveldið ég ætla að fá 1.5L Gray Goose, get ég borgað með 10 Egill Plöder kveðjum? pic.twitter.com/mOBRxmiG1Q
— Siffi (@SiffiG) June 28, 2021
Kolbrún Birna Hallgrímsdóttir Bachmann birti í gær á Twitter-síðu sinni að hún hefði búið til fyrirlestur sem ber nafnið „Forvarnarfræðsla og verklag í ofbeldismálum“. Fyrirlesturinn var sýndur starfsmönnum Bankastræti Club í gær og segir Kolbrún að nú stefni allt í betra og öruggara djamm.
Stefnir allt í betra og öruggara djamm 🤝 pic.twitter.com/sjlUEitdEr
— Kolbrún Birna (@kolla_swag666) June 29, 2021
