Birgitta Líf Björnsdóttir, markaðs- og samfélagsmiðlastjóri World Class og eigandi Bankastræti Club, er mikið fyrir jólin. Þetta er á meðal þess sem fram kemur í jólablaði verslunarinnar Nettó.

„Ég er algjört jólabarn,“ segir Birgitta í viðtalinu við jólablaðið. Hún segir jólin vera dásamlegan tíma með fjölskyldu og vinum sem lýsir upp skammdegið. „Mér finnst alltaf jafn notalegt að byrja jólabaksturinn og erum við fjölskyldan dgleg að baka saman. Hjá mér einkennast jólin líka af spilakvöldum með vinum sem eru virkilega dýrmætar og skemmtilegar stundir. Að rölta Laugaveginn á Þorláksmessu er síðan partur af því að hringja inn jólin.“

Birgitta segir að fólk eigi aldrei að fá samviskubit yfir því að njóta um jólin þar sem þau eru dásamlegur tími með gómsætum kræsingum. „Það þarf bara að gæta hófs og reyna að fá góða og holla næringu á milli jólaboðanna.“

Þá segir Birgitta að henni finnist jólin vera einn skemmtilegasti tíminn til að fara í ræktina. „Því maður hefur nægan tíma, flestir eru í fríi svo það er hægt að æfa í góðra vina hópi, og síðan er auka bónus að svitna út sykrinum og saltinu,“ segir hún.

Birgitta segir matseld fjölskyldunnar sinnar standa upp úr hjá sér þegar kemur að jólamatnum. Hún deilir svo uppskriftinni að uppáhaldsmeðlætinu sínu, „heimsins besta rauðkáli“ eins og hún kallar það.

Hér fyrir neðan má sjá hvernig Birgitta útbýr rauðkálið fyrir jólin:

Innihald:

1 ferskur rauðkálshaus

Ósaltað smjör

3 matskeiðar sykur

Heslihnetur (eftir smekk

Aðferð:

„Skerið niður rauðkálið. Bræðið klípu af ósöltuðu smjöri á stórri pönnu. Setjið rauðkálið út á pönnuna og lofið því að mýkjast í smjörinu. Stráið sykrinum yfir og þannig brúnast rauðkálið. Stráið að lokum heilum heslihnetum yfir eftir smekk.“