Ofurfyrirsætan Bella Hadid hefur nú stigið fram og greint opinberlega frá andlegum veikindum sem hún hefur glímt við. Hún deildi nokkrum myndum af sér grátandi á Instagram og sagði að hún hafi brotnað niður á hverjum degi í nokkur ár.
Bella er 25 ára og hefur getið sér mjög gott orð sem fyrirsæta. Systir hennar er fyrirsætan Gigi Hadid og móðir hennar fyrrverandi fyrirsætan og núverandi raunveruleikastjarnan Yolanda Hadid.
Bella deildi myndbandi af Willow Smith, dóttur leikarans Will Smith, þar sem hún talar um andlegt heilbrigði, á Instagram og opnaði sig í leiðinni um sína eigin baráttu í einlægri færslu.
„Svona hafa eiginlega allir dagar og öll kvöld verið í nokkur ár núna. Samfélagsmiðlar eru ekki raunverulegir. Fyrir ykkur sem eigið erfitt, munið það,“ skrifar Bella ásamt myndunum.
„Sjálfshjálp og andleg veikindi/efnafræðilegt ójafnvægi er ekki línulegt heldur nánast eins og rússíbani af hindrunum. Það fer upp og niður og til hliðar. En ég vil að þið vitið að það er alltaf ljós við enda ganganna og rússíbaninn stoppar alltaf á einhverjum tímapunkti.“
Bella segir að það hefði tekið hana langan tíma að átta sig á því. „En ég hef brotnað nógu oft niður til að vita þetta. Ef þú vinnur nógu mikið í þér sjálfri, tekur þér tímann til að læra að skilja áföllin þín, triggerana þína, gleðina þína og rútínu, þá áttu alltaf eftir að geta skilið eða lært meira um eigin sársauka og hvernig þú getur meðhöndlað hann.“
View this post on Instagram
