Einn ástsælasti leikari Danmerkur, Nikolaj Lie Kaas, hefur verið harðlega gagnrýndur fyrir að ljá karakternum Joe, í danskri útgáfu kvikmyndarinnar Soul, rödd sína. Nikolaj Lie Kaas er hvítur, en karakterinn Joe er svartur.

Gott er að taka fram að svipuð mál eru upp á teningnum í öðrum Evrópulöndum, en danska málið hefur vakið sérstaka athygli.

Soul er teiknimynd og er sú fyrsta frá bandaríska framleiðslufyrirtækinu Pixar sem skartar svörtu fólki í aðalhlutverki og auk þess sérstaka áherslu á menningu svartra í Bandaríkjunum. Það er leikarinn Jamie Foxx sem fer með hlutverk Joe í upprunalegu útgáfunni. Hann er svartur og sagði það mikinn heiður að leika fyrstu svörtu aðalpersónuna í sögu Pixar.

Þegar myndin kom fyrst út í desember síðastliðnum kepptust danskir gagnrýnendur við að lofa myndina. Umræðan hefur þó breyst mikið eftir að í ljós koma að Lie Kaas fari með hlutverk Joe í dönsku útgáfunni.

Fjölmiðillinn Berlingske spurði fræðafólk og aktívista hvað þeim þætti um málið lýstu flestir yfir vonbrigðum sínum. Þau sögðu að um væri að ræða rasisma sem væri grafinn í samfélagsskipulagi Danmerkur.

Nú hefur Nikolaj Lie Kaas tjáð sig um málið á Facebook-síðu sinni, en hann hefur sjálfur fengið mikið af gagnrýninni fyrir að taka að sér hlutverkið. Hann sagði að hans reynsla væri sú að sá sem væri hæfastur í starfið ætti að fá starfið. Einnig sagðist hann vinna við það að vera einhver annar en hann sé í raun og veru og því sé ekkert skrýtið að hann taki að sér hlutverk Joe. Hann sagði að þó væru til tilfelli þar sem að væri óviðeigandi að einstaklingur léki einstakling með annan húðlit.

Afsökunarbeiðni Lie Kaas hefur einnig vakið mikla athygli, en margir eru ansi ósáttir með hana. Þess má geta að umræða um hana hefur skapast á meðal Íslendinga á samfélagsmiðlum vegna um málið og hvort það sé réttlætanlegt að hvítir einstaklingar taki að sér hlutverk svartra persóna.

Risastórir fjölmiðlar um allan heim hafa nú fjallað um málið. Þar má nefna New York Times, The Indepnedent og Indie Wire.