Þrálátur orðrómur var á kreiki í sumar um að Tanja Ýr Ástþórsdóttir, áhrifavaldur og athafnakona, og Egill Fannar Halldórsson, athafnamaður og áhrifavaldur, væru hætt saman. DV bárust fjöldi ábendinga um að sambandinu væri lokið og var meðal annars bent á að parið hafði ekki lækað færslur hvors annars á samfélagsmiðlum í nokkrar vikur.

DV náði sambandi við Egil sem var spurður út í orðróminn. Hann vísaði því alfarið á bug að þau væru hætt saman og segir að aðeins um orðróm um að ræða eins og áður. Þetta var nefnilega ekki í fyrsta sinn sem fólk heldur að þau hafi sagt skilið við hvort annað. Þannig hefur Tanja Ýr í nokkur skipti þurft að gefa út yfirlýsingar í Story á Instagram vegna fjölda spurninga frá fylgjendum sínum um sambandsstöðu þeirra.

Svo virðist þó vera sem sambandinu sé lokið núna. Smartland greinir frá því að parið sé hætt saman og er í fréttinni sagt að það hafi gerst fyrir nokkrum vikum síðan. Þá er bent á að þau séu nú hætt að fylgja hvoru öðru á samfélagsmiðlinum Instagram.

Tanja og Egill hafa verið saman í nokkur ár en þau trúlofuðu sig árið 2014 þegar þau voru stödd á ferðalagi í Mexíkó. Þau voru mikið fyrir að ferðast og fluttu til að mynda til Tyrklands fyrr á þessu ári.