Í Facebook-hópnum „Hver hendir svona?“ birtist ansi áhugaverð færsla í gær frá einstakling sem hafði farið í verslunarferð í Góða hirðinn. Til sölu var nefnilega þessi glæsilegi titrari.

Þetta er þó enginn venjulegur titrari heldur er þetta stórt tryllitæki sem konum er væntanlega ætlað að setjast á þó svo að blaðamaður hafi lítið vitað um það enda gekk netleit hans að svipuðu tæki ansi brösuglega. Þá kom kommentakerfið til bjargar og ein sem fann tækið á vefsíðu sex.is.

Nýtt tæki kostar 75.000 krónur og því er um að ræða 80% afslátt. Fyrirsætan á kassa titrarans virðist vera að njóta sín í botn og greinilegt að hér er frábært tæki á ferðinni.

Meðlimir hópsins höfðu mjög gaman af þessari færslu og bárust yfir 50 ummæli. „Konan sem átti þetta henti því vonandi áður en það reið henni að fullu.“, „Bíddu, ha? Er þetta eitthvað fornaldar apparat? Eða alveg nýmóðins? Á að sitja ofan á þessari sósukönnu???“ og „Ætli að starfsmaðurinn sem verðlagði þetta sé að verðleggja samkvæmt reynslu,“ voru meðal ummæla.

Þetta er ekki í fyrsta sinn sem kynlífstæki er til sölu í Góða hirðinum en það vakti mikla athygli árið 2016 þegar „sjúskuð gervipíka“ var til sölu þar á aðeins 1.500 krónur. Þá var greint frá því að Góði hirðirinn fái til sín talsvert magn af kynlífsleikföngum en þau væru venjulega ekki sett í sölu.