Á vefsíðunni Bubbi.is er nú hægt að kaupa textaverk frá okkar ástsælasta tónlistarmanni allra tíma, Bubba Morthens. Lögin sem hægt er að kaupa textabrot úr eru Strákarnir á borginni og Regnbogans stræti.
„Ástæðan fyrir því að ég gerði þetta er sú að það eru að berast fréttir til okkar úr heiminum um að umræðan um réttindi samkynhneigðra sé alltaf að verða þrengri og þrengri,“ segir Bubbi í samtali við blaðamann DV og nefnir Rússland, Ungverjaland og Pólland sem dæmi.
„Þetta getur gerst á meðan við sofum, við vöknum og normið er orðið það að það megi ráðast á homma, það megi ráðast á regnbogafólk, það megi ráðast á rauðhærða og hitt og þetta. Það er kveikjan fyrir því að ég valdi Strákarnir á borginni og Regnbogans stræti fyrir þessi verk,“ segir Bubbi og bætir við að þetta sé auðvitað líka til að eiga fyrir salti í grautinn.
Bubbi seldi einnig textaverk um seinustu jól og ætlar sér að gera það aftur þessi jól. Þá ætlar hann að bjóða upp á texta úr lögum á borð við Afgan og Það er gott að elska.
Textana fyrir Strákarnir á borginni og Regnbogans stræti á Bubbi enn handskrifaða. Fyrri textann skrifaði Bubbi fyrir 40 árum síðan.
„Ég á Strákarnir á borginni frá árinu 1981 og Regnbogans stræti skrifaði ég á Hótel Færeyjar á bréfsefni frá hótelinu. Gleðidagarnir eru að renna upp og ég hugsaði að þetta væri góð leið til að vekja athygli á því hvað það er stutt í fordóma. Því miður. Við höldum að við séum rosalega frjálslynd en fasisminn, hann er á sveimi í kringum okkur bara við landsteinana,“ segir Bubbi.
Hann segir söluna ganga vel en til eru 16 eintök af hverju verki. Öll verk eru númeruð, árituð og vottuð. Ramminn kemur frá Þýskalandi og eru verkin varin frá útfjólubláum geislum. Bubbi segir að fólk geti verið með verkin í sólinni í 100 ár án þess að neitt gerist við verkið.
