William Lee Adams og Deban Aderemi hjá Wiwibloggs eru meðal fremstu Eurovision-sérfræðinga heims. Myndbönd þeirra á YouTube þar sem þeir dæma þau lög sem búið er að velja í keppnina vekja ávallt mikla lukku en í gær tóku þeir fyrir Eurovision-framlag Íslendinga, Think About Things, með Daða og Gagnamagninu.

William og Deban eru vægast sagt afar hrifnir af laginu og segja til að mynda að það sé „stórkostlegt“ og „sætt“. Þá finnst þeim mikill nostalgíu fílíngur í laginu í anda leikjatölvanna Nintendo og Atari. „Þau eru eins og álfar í Atari-leik frá níunda áratug síðustu aldar,“ segja þeir til dæmis og bæta við:

„Þetta er svo lúðalegt – ég elska það“

Þeir eru einnig hrifnir af því að Daði og Gagnamagnið geri grín að Eurovision-klisjunum; upphækkuninni, vindvélinni og hljóðfærum sem ekki má spila á í beinni útsendingu. Þá telja þeir einnig að það vinni með Gagnamagninu hve venjuleg þau eru í keppni þar sem flestir gera mikið út á að fegra útlit sitt. William og Deban eru ekki í vafa um að laginu gangi vel ytra. Spá því að það lendi í einhverju af tíu efstu sætunum.

„Kemst það upp úr undanriðlinum? Tvímælalaust. Mun því ganga vel? Tvímælalaust.“

Daði og Gagnamagnið hafa rokið upp í veðbönkum síðustu daga. Rétt fyrir úrslitin á laugardagskvöld var Íslandi spáð 11. sæti í Eurovision. Þegar í ljós kom að Daði og Gagnamagnið yrðu fulltrúar Íslands hoppaði Ísland upp í 8. sæti. Í dag er Íslendingum spáð 3. sæti í keppninni. Búið er að horfa hátt í tvö hundruð þúsund sinnum á YouTube á frammistöðu Daða og Gagnamagnsins á úrslitakvöldi Söngvakeppninnar á laugardag. Þá nálgast spilanir á myndbandinu við lagið, sem sjálfur Russell Crowe deildi, milljón spilanir.

Sjá einnig: Daði fær stuðning úr óvæntri átt – Sjáðu hvað Russell Crowe sagði um lagið.

Hér fyrir neðan má sjá vangaveltur Eurovision-spekinganna um lagið: