Við fengum álitsgjafana Bergþóru Magnúsdóttur búningahönnuð, Elísabetu Gunnars tískubloggara, og Kormák Geirharðsson verslunarmann til að tilnefna best klædda Íslendinginn.
„Hildur Guðnadóttir tónskáld. Hún er með fágaðan stíl sem er einhvern veginn allt í senn tímalaus og afslappaður en afgerandi. Hún ber alltaf af.“
-Bergþóra Magnúsdóttir
„Bríet söngkona. Með einstakan stíl. Gaman að fylgjast með hvernig hann vex með henni með hverju árinu. Fer sínar eigin leiðir. Óhrædd að prófa sig áfram.“
-Bergþóra Magnúsdóttir
„Stefán Svan, fatahönnuður og verslunareigandi. Með vandaðan stíl. Litríkur og þorir að blanda saman ólíkum efnum og mynstrum.“
-Bergþóra Magnúsdóttir
„Shoplifter Hrafnhildur Arnardóttir myndlistarmaður. Framúrstefnuleg og öðruvísi. Hún er eins og úr öðrum heimi. Blandar saman öllum litum, mynstrum í bland við alls konar efnisáferðir og allt gengur þetta upp á einhvern ævintýralegan hátt.“
-Bergþóra Magnúsdóttir
„Þetta er mögulega erfiðasta árið til að svara einmitt þessari spurningu. Þar sem við vorum flest klædd í náttbuxur að neðan, gerðum lítið og hittum fáa. Sú fyrsta sem kemur upp í huga mér er fatahönnuðurinn og vinkona mín Andrea Magnúsdóttir. Hún var ein af fáum sem klæddi sig í kjól alla daga í fyrstu bylgju Covid og hvatti aðrar konur til að gera slíkt hið sama með því að koma af stað myllumerkinu #kjólaáskorun á Instagram,“ segir Elísabet.
-Elísbet Gunnarsdóttir
„Skjöldur prýðir jakkaföt ansi vel og er með óaðfinnanlega bindishnúta. Og er tignarlegur á velli.“
-Kormákur Geirharðsson
„Edda Andrésdóttir fjölmiðlakona. Edda er trú sínum stíl sem og flott, hvort sem það er rúllukragi og dragt, eða skyrta og dragt. Trylltu „70‘s“ gleraugun hennar setja svo punktinn yfir i-ið.“
-Bergþóra Magnúsdóttir
„Ég get ekki sleppt að nefna Ölmu Möller landlækni. Hún er með klassískan og fágaðan stíl, sem hún er óhrædd við að poppa upp með sterkum litum þegar við á. Glæsileg kona.“
-Bergþóra Magnúsdóttir
„Það gefur og gleður að klæða sig upp og mikið hlakka ég til að hitta fólk og hafa gaman aftur, þegar það má.“
Elísabet nefnir aðra Íslendinga sem henni þótti einstaklega vel klæddir á árinu: „Saga Sig, Ragga Gísla, Andrea Röfn, Eliza Reid, GDRN og Bríet.“
-Elísabet Gunnarsdóttir
