Radford fjölskyldan er stærsta fjölskylda Bretlands. Sue Radford er 45 ára og eiginmaður hennar, Noel Radford, er 49 ára.

Þau eiga saman 22 börn, Sue var 14 ára þegar þau áttu það elsta og þau eignuðust það yngsta í apríl 2020.

Börnin eru; Chris, 31 árs, Sophie, 27 ára, Chloe, 25 ára, Jack, 23 ára, Daniel, 21 árs, Luke, 20 ára, Millie, 19 ára, Katie, 18 ára, James 17 ára, Ellie, 15 ára, Aimee, 14 ára, Josh, 13 ára, Max, 12 ára, Tillie, 10 ára, Oscar, 9 ára, Casper, 8 ára, Hallie, 5 ára, Phoebe, 4 ára, Archie, 3 ára, Bonnie, 2 ára, og Heidie, átta mánaða. Alfie Thomas fæddist andvana 2014.

Tvö elstu börnin búa ekki lengur heima, en Millie, sem er nítján ára, eignaðist dóttur, Ophelia, í september.

Það er því óhætt að segja að það sé mikið líf og fjör á heimilinu.

Fjölskyldan er vinsæl á samfélagsmiðlum með yfir 330 þúsund fylgjendur á Instagram. Þau halda einnig úti YouTube-rás með yfir 240 þúsund fylgjendur. Þau eru dugleg að deila myndum af heimili sínum og tók The Sun nokkrar myndir saman.

Það er ekki leikur einn að koma svona mörgum börnum fyrir. Það eru tíu svefnherbergi í húsinu og þurfa því mörg börn að deila herbergi. Húsið er á fjórum hæðum. Fjölskyldan tók garðinn nýlega í gegn, skipti út grasinu fyrir gervigras og fjölskyldufaðirinn smíðaði útibar.