Matreiðslubók Guðrúnar Sóleyjar Gestsdóttur, Grænkerakrásir, var á dögunum veitt hin eftirsóknarverðu Gourmand-matreiðslubókarverðlaun í tveimur flokkum. Sigraði Guðrún flokkinn veganbækur og fangaði þriðja sæti flokks skandínavískra bóka. Bækur frá fleiri en 200 löndum og landsvæðum keppast um verðlaunin árlega og samkeppnin sé hörð um þessi 25 ára gömlu verðlaun.
Bókin kom út fyrir jólin 2018 og hlaut strax mikið lof. Í tilkynningu frá Sölku, útgefanda bókarinnar segir að „Guðrún Sóley hefur alla tíð verið matargat og sælkeri sem veit fátt betra en að borða góðan mat, helst með mikilli sósu, í góðum félagsskap. Fyrir nokkrum árum ákvað hún að stíga skrefið til fulls og verða alfarið vegan. Þá hófst nýr kafli sem sneri að því að fóta sig með ný hráefni og nýjar forsendur í matargerð.“
Sá kafli stendur enn yfir segir í tilkynningunni og matur eitt það skemmtilegasta sem Guðrún tekur sér fyrir hendur. „Heill heimur opnaðist fyrir mér og ég trúði varla möguleikunum sem öll þessi hráefni bjóða upp á; kryddin, ferska grænmetið, baunirnar, ávextirnir, jurtirnar, hneturnar, fræin. Pastað! Pizzurnar! Hamborgararnir! Kökurnar, kruðeríið og sælgætið. Og sósurnar – maður lifandi, sósurnar!“ segir Guðrún Sóley.
Vegan mataræði byggir á því að leggja sér ekki til munns neinar vörur sem framleiddar eru beint eða óbeint úr afurðum dýra. Hefur þessi tegund mataræðis rutt sér til rúms á undanförnum árum á vesturlöndum og gefa fylgismenn fyrir því þrjár ástæður: Meðvitund mannkyns fyrir dýraríkinu og velferð þess hefur aukist mikið á síðustu árum, neikvæð umhverfisáhrif dýraræktunar aukast með aukinni dýrarækt og svo hefur veganismi ekki síst verið svar sumra við aukinni tíðni offitu og tengdum lífsstílssjúkdómum.
Guðrún Sóley segir þó að „[v]eganismi [sé] ekki tiltekið mataræði, hann er ekki meinlætastefna og allra síst megrun. Hann er hugmyndafræði sem miðar að því að binda endi á kerfisbundið ofbeldi gegn dýrum, taka skilvirk og risastór skref í átt að umhverfisvernd og tryggja okkur hreysti, vellíðan og hamingju.“
Ljósmyndir bókarinnar tók Rut Sigurðardóttir og hönnun í höndum Þorbjargar Helgu Ólafsdóttur hjá Farva. Afhending Gourmand-verðlaunanna átti að fara fram í París í júní en vegna aðstæðna varð ekkert af þeirri verðlaunaafhendingu og var því slegið í óformlega verðlaunaafhendingu á Vinnustofu Kjarvals á 17. júní síðastliðinn.
