Þjófur náðist á mynd skömmu eftir miðnætti í morgun fyrir utan Melabúðina að Hofsvallagötu.

Þetta kemur fram í Facebook-hópnum „Vesturbærinn“ þar sem íbúar Vesturbæjar eru duglegir að deila fregnum um bíla- og hjólaþjófnað, kattahvörf og áhyggjum af umferðarframkvæmdum.

Var það vaskur vesturbæingur sem náði myndum af þjófinum. Í skjóli nætur hefur þjófurinn skotist á milli lagðra bifreiða með hanska í kjaftinum, að því er virðist skömmustulegur á svip. Segir myndatökumaðurinn: „Náði myndum af þjófi. Var að stela hanska fyrir framan Melabúðina.“

Á myndunum sem Vesturbæingurinn birti á Facebook-síðunni sést gulbröndóttur köttur ganga digur á milli bifreiða með hanska á milli tannanna.

Svarar þá hygginn nágranni og spyr hvort kötturinn hafi ekki einfaldlega verið að plokka rusl. „Var hann ekki bara að plokka? Nóg er af hönskum sem búið er að henda út um allt.“

Eigandi kattarins gefur sig þá fram í hópnum og segir köttinn á sínum vegum:

„Þessi er víst á okkar vegum – hinn samviskulausi Elías sem svaf værum svefni eftir afrek kvöldsins…“ og heldur áfram: „Ég vissi ekki einu sinni að hann væri frægur! Algjör letihaugur hér heima!“

Stuttu síðar svarar Bogi Ágústsson, fréttamaður RÚV að líklega sé um að ræða hanska sem hann tapaði deginum áður. Biður hann kettinum eigi góðar kveðjurnar. Hann segir: „Örugglega hanski sem ég tapaði í gær, steliþjófurinn á að skammast sín!“