Berglind Saga Bjarnadóttir er nýjasti gestur Föstudagsþáttarins Fókus, hlaðvarpsþáttar dægurmáladeildar DV. Hún er móðir og vinnur við vöruþróun í íslenskri matvælaframleiðslu. Berglind heldur úti vinsælum Instagram-aðgangi þar sem hún deilir ýmislegu uppbyggilegu ásamt frá sínu daglega lífi.

Berglind hefur mikinn áhuga á heilbrigðu matarræði og hreyfingu. Fyrir nokkrum árum síðan var Berglind á slæmum stað, bæði andlega og líkamlega.

„Frá barnsaldri hafði ég verið í yfirvigt. Ég þekkti ekki næringu eða hollustuhætti almennilega. Þegar ég eignaðist strákinn minn [um tvítugt] var ég komin á mitt þyngsta og orðin nokkuð stór. Það var kannski ekki endilega þyngdin sem skipti máli heldur hvar andlega líðan mín var á þessum tíma. Mér leið ekki vel. Ég var langt niðri og mig langaði bara að komast á annan stað. Ég tók mig gjörsamlega á, bæði í öllu mataræði og hvernig ég fór að hugsa um sjálfa mig. Ég náði frábærum árangri,“

segir Berglind.

Berglind segir að andlega heilsan sé það sem skipti máli og líkamlega heilsan fylgi þar á eftir. Hún segist þó hafa fundið mikinn mun á sér.

„Maður var byrjaður að fara í næstu inniskó sem voru innan handar frekar en að beygja sig niður og reima skóna. Líkamlega ástandið sem ég var komin í þá var bara alltof þungt. Það er ekki heilbrigt að vera svona þungur. Ég var orkulítil og þreytt. Alls konar kvillar fylgja því þegar maður er svona þungur, ekki bara andlega heldur er manni líka kannski illt í bakinu og hnjánum,“

segir Berglind.

Aðspurð um hvað hún hafi gert svo henni leið betur andlega sem og líkamlega segir Berglind:

„Það var fyrst og fremst að taka ákvörðunina um að breytast. Ég áttaði mig á því að þetta væri manneskjan sem ég væri orðin og ég hugsaði hvaða manneskja langar mig til að verða. Ég setti mér markmið. Fyrst skrifaði ég niður í notes í símanum mínum hvernig mér leið. Ég kom því öllu út. Því oft setur maður þetta til hliðar, sérstaklega þegar það er mikið að gera hjá manni. Ég skrifaði niður nákvæmlega hvernig mér leið og svo fór ég að hugsa hvernig langar mig til að líða og hvað get ég gert til að komast á þann stað,“ segir Berglind.

Horfðu á Föstudagsþáttinn Fókus í heild sinni hér að neðan.