Felix Bergson, fararstjóri íslenska Eurovision-hópsins er ekki ánægður með framgöngu flugvallastarfsmanna í Tel Aviv. Hann segir frá því í samtali við Morgunblaðið.

„Þetta er óneitanlega eitthvað sem fór fyrir brjóstið á mér, ég er ekki ánægður með svona framgöngu,“ segir Felix í samtali við Morgunblaðið.

Flugvallastarfsmenn í Tel Aviv montuðu sig á netinu að hafa gefið meðlimum Hatara léleg sæti í flugvélinni frá Tel Aviv í gær.

Einar Stefánsson, trommari Hatara, benti á Instagram-síðu sinni í gær að ísraelska flugfélagið El Al hafi sett hljómsveitina í verstu mögulegu sæti á leiðinni frá Ísrael.

Hann deildi skjáskoti af færslu Daher Dahli nokkurs sem birtir skjáskot þar sem starfsmenn flugfélagsins monta sig af því að hafa úthlutað Hatara miðju sæti og aðskilin. Hægt var að sjá sætisnúmer hljómsveitarmeðlima sem og flugnúmer vélarinnar.

„Þetta er það sem þau fá fyrir að mótmæla,“ hefur Dahli eftir starfsmönnum.

Eins og fyrr segir er Felix ekki ánægður með framferði starfsmannana og segir við Morgunblaðið að hópurinn ætlar sér að skoða málið nánar á næstu dögum og gera athugasemdir.

„En hvort það fari í gegnum okkar samstarfsaðila, sem er Icelandair, sem bókar flugið, eða einhverja aðra verður bara að koma í ljós,“ segir Felix.

Felix segir að hópurinn hafi velt fyrir sér hvort þau ættu að gera mál úr þessu á flugvellinum en ákváðu að bíða með það og gera frekar formlega kvörtun. „Auk þess sem við vildum ræða við okkar menn hjá Ríkisútvarpinu um hvað fólk vildi að við gerðum í þessu, en mér finnst þetta ekki gott mál,“ segir Felix við Morgunblaðið.